Ola Saam 22:1-31

¹Main God, main God, wotfo yubin libum mi? Wotfo yu jidan longwei brom mi? Mi jingat langa yu. Wotfo yu nomo album mi?

²Deitaim en naitaim mi jingat langa yu, main God, bat yu nomo ensim mi, najing, en mi nomo abum spel.

³Bat yu na det holiwan God, en yu jidan det brabliwan Bos, en yu pipul langa Isreil oldei preisimbat yu.

⁴Melabat grengrenfatha olabat bin oldei trastimbat yu. Olabat bin trastim yu en yubin seibum olabat.

⁵Olabat bin jingat langa yu en yubin seibum olabat. Olabat bin trastim yu en yubin album olabat.

⁶Pipul tok mi rabishwan en reken mi nomo enijing, laiga brabli men. Olabat oldei meigim fan langa mi en oldei heidimbat mi.

⁷Wen enibodi luk mi, olabat mokimbat mi. Olabat poindimbat bingga langa mi en tok olkain rabishwan wed langa mi.

⁸Olabat tok, “Yu oldei go langa YAWEI blanga ebrijing. Wotfo im nomo seibum yu? If YAWEI laigim yu, wotfo im nomo album yu?”

⁹Bat yu na bin kipum mi seifwan wen aibin bon, en wen aibin beibi yubin kipum mi seifwan du.

¹⁰Brom det dei wen aibin bon, yubin oldei maindimbat mi. Yubin oldei jidan main God.

¹¹Nomo jidan longwei brom mi God. Det trabul im gulijap en nobodi iya blanga album mi.

¹²Loda enami jidan raidaran langa mi jis laik ola wailwan bul. Olabat raidaran langa mi, jis laik ola wailwan bul brom det kantri gulum Beishan.

¹³Olabat jis laik detlot laiyan weya jingat adbala redi blanga dagat mi.

¹⁴Mi nomo strongbala enimo na, jis laik woda wen spil langa graun en im binij. Mi gulijap binij du, jis laiga kendul weya meltap. Ai nomo garram bodi en ol main boun slekwan en bin kamat na.

¹⁵Main mawus im draiwan jis laik brabli draiwan graun. Mi brabli thesti na. Yubin libum mi blanga dai langa graun.

¹⁶Main enami olabat bin kaman brom ebriweya en jadimap mi jis laik ola wailwan dog, en deibin jalk main bingga en fut.

¹⁷Mi bouniwan na, en main enami olabat lukinatbat mi brabliwei.

¹⁸Olabat bin deigidawei main klos en olabat bin kadimat gija, en deibin gembul blanga main kout.

¹⁹YAWEI, nomo jidan longwei brom mi. Yu kaman kwikbala blanga album mi, en yu meigim mi jidan strongbala.

²⁰Seibum mi brom detlot bigwan naif blanga ol main enami. Seibum main laif brom ol main strongwan enami. Olabat jis laik detlot wailwan dog.

²¹Ol main enami jidan brabli krulbala. Seibum mi brom olabat. Olabat jis laik detlot wailwan bul en laiyan.

²²Ai garra dalim main pipul wanim yubin dum. Wen olabat majurrumap miselp, ai garra preisim yu rait deya langa olabat.

²³Yumob pipul hu wek blanga YAWEI, yumob preisim im. Yumob ola femili blanga Jeikob, yumob gibit rispek langa im. Yumob pipul blanga Isreil, yumob weship im.

²⁴YAWEI nomo tridim ola powan pipul rabishwei, en im nomo jis libum olabat lagijat igin wen olabat ardimbat. Im nomo tenawei brom olabat. Im ensim olabat wen dei jingat langa im blanga album olabat.

²⁵YAWEI, lida langa ebribodi, ai garra preisim yu blanga wanim yubin dum. En deya na wen dei weshipbat yu, ai garra gibit sekrifais ofring weya aibin pramis.

²⁶Ola powan pipul garra dagat blendibala daga raidap dei bulap. Wen pipul kaman langa yu YAWEI, dei garra preisim yu. God, yu oldei gibitbat olabat ola gudbala ting.

²⁷Pipul langa ebri kantri garra jinggabat langa YAWEI en dei kaman langa im. Ola traib langa ebri kantri garra weship langa im.

²⁸YAWEI det trubala God im brabli Bos, en im jidan Bos langa ebri kantri.

²⁹Ola pipul hu jidan praudbalawei garra nildan lida langa im. Nobodi kaan seibum olabat ronwan laif. Olabat garra ol nildan lida langa im.

³⁰Ol detlot pipul hu garra kaman biyain langa wi garra wek blanga YAWEI, en olabat garra dalim olabat biginini olabat blanga im.

³¹Detlot pipul hu nomo bin bon yet garra kipgon tok, “YAWEI det trubala God bin seibum im pipul olabat.”