Ola Saam 18:34-43

³⁴Ai sabi hau blanga fait langa main enami olabat en bidim olabat, dumaji YAWEI na bin lenim mi blanga fait.

³⁵Wal YAWEI, yu na det trubala God, en yu oldei lukaftumbat mi en seibum mi brom main enami olabat. Yu na bin oldei album mi en meigim mi haibala,

³⁶en yu nomo bin larram main enami olabat grebum mi, en yu nomo bin larram mi buldan du.

³⁷Aibin oldei ranimap main enami olabat raidap aibin gajimap olabat. Ai nomo bin oldei stap raidap aibin binijimap olabat.

³⁸Aibin oldei bidim olabat brabliwei, en aibin oldei meigim olabat lus, en dei kaan gidap en fait langa mi igin.

³⁹Wal YAWEI, yu na bin oldei meigim mi strongbala blanga fait langa main enami olabat en bidim olabat,

⁴⁰en yu na bin oldei meigim olabat ranawei brom mi wen deibin oldei luk mi kaman, en aibin oldei binijimap ol detlot enami main hu nomo bin laigim mi.

⁴¹Deibin oldei jingat blanga sambodi blanga album olabat en seibum olabat brom mi. Bat nobodi bin seibum olabat. Deibin jingat langa yu, bat yu nomo bin irrim olabat.

⁴²En aibin oldei bastimap olabat jis laiga wekinmen weya im bastimap graun en det win blowimwei det das. Aibin oldei pudumbut langa olabat jis laik weya ola pipul pudumbut langa mad langa roud.

⁴³Wal YAWEI, yu na det trubala God, en yubin seibum mi brom detlot pipul wen deibin wandi kilim mi ded, en yubin meigim mi jidan king blanga ola najalot traib du weya ai nomo bin sabi olabat.