Ola Saam 14:1-6

¹Siliwan pipul reken, “God nomo jidan!” Olabat holot brabli nogudwan, en olabat bin dumbat ola brabli nogud ting. Nobodi iya dum enijing rait.

²YAWEI im lukdan brom hebin blanga luk if enibodi jidan raitwei, en if enibodi weship im du.

³Bat deibin ol tenawei brom YAWEI, en holot na jidan nogudwan. Nobodi dum rait ting enimo.

⁴YAWEI im tok, “Maitbi dei nomo sabi. Wotfo dei kaan len, dislot nogud pipul? Olabat oldei deigimwei ebrijing brom main pipulmob. Olabat nomo jingat langa mi.”

⁵Bat bambai God garra meigim olabat bradin brabliwei, dumaji im jidan garram ol detlot pipul hu teiknodis langa im.

⁶Detlot nogudbala pipul gibit adtaim langa ola powan pipul hu nomo garram enijing, bat YAWEI im maindimbat olabat.