Ola Saam 146:2-9

²Ai garra preisimbat YAWEI raidap ai binij. Ai garra sing langa main God olawei wen mi jidan laibala.

³Nomo trastim detlot pipul hu jidan boswan o najalot pipul, dumaji olabat jis pipul en dei kaan seibum yu.

⁴Wen olabat binijap, dei berrim olabat. En afta, ebrijing olabat bin jinggabat blanga dum garra ol binij du.

⁵YAWEI, det God blanga wi grenfatha Jeikob, im na album wi wen wi trastim en weship langa im. Dumaji im lagijat wi jidan hepiwan.

⁶YAWEI na bin meigim det skai, graun, woda en ola ebrijing weya jidan langa olabat. Im oldei dum wanim imbin pramis.

⁷YAWEI oldei dum wanim rait blanga detlot pipul wen enibodi dum nogudbala ting langa olabat. Im gibit daga langa detlot pipul hu jidan hanggriwan. Im album detlot pipul hu garram enikain trabul, jis laik sambodi larramgo olabat fri brom jidanbat prisana.

⁸Im meigim blainwan pipul luk. Im album detlot pipul hu garrimap hebiwan loud brom najalot pipul. Im laigim detlot pipul hu bulurrum det wei blanga im.

⁹YAWEI lukaftumbat ola powan streinja pipul. Im lukaftumbat detlot biginini en widogel hu nomo garram enibodi blanga lukaftum olabat. Im meigim det laif go nogud blanga ola nogudbala pipul.