Ola Saam 145:1-17

¹Ai garra dalimbat blanga det haibalawei blanga yu, main God, en main king, Ai garra gibitbat theingks langa yu olagijawan.

²Ai garra gibitbat theingks langa yu ebridei. Ai garra preisim yu olagijawan.

³YAWEI im haibalawan en pipul garra preisim im neim brabliwei. Nobodi nomo sabi brabli det haibalawei blanga im.

⁴Ola pipul en olabat biginini hu garra jidan bambai garra preisim yu blanga wanim yubin dumbat. Olabat na garra toktokbat blanga ola brabli gudwan ting yubin oldei dumbat.

⁵Olabat garra toktok blanga yu pawa en blanga yu haibalawei. Ai garra jinggabat ol detlot brabli gudbala ting yubin oldei dumbat.

⁶Ola pipul garra toktok blanga ola ting weya yubin dumbat, en ai garra dalimbat ebribodi blanga yu haibala pawa.

⁷Olabat garra dalimbat blanga detlot gudbala ting blanga yu, en olabat garra sing song blanga det kainbalawei blanga yu.

⁸YAWEI laigim pipul en im garram soriwan filing blanga olabat. Im nomo gitwail kwikbala en olataim im garram det filing blanga laigim pipul olagijawan.

⁹YAWEI im gudbala langa ebribodi. Im kainbala langa ebrijing weya imbin meigim.

¹⁰Ebrijing yubin meigim garra preisim yu YAWEI, en ola pipul blanga yu garra gibit theingks langa yu.

¹¹Olabat garra tok blanga hau yu jidan haibalawan bos, en dalimbat blanga yu strongwan pawa,

¹²wulijim ebribodi garra sabi blanga ola gudbala ting yubin dum, en blanga det haibala pleis weya yu jidan boswan.

¹³Det haibala pleis garra jidan olagijawan, en yu garra jidan boswan olagijawan. YAWEI oldei kipum im wed trubalawei. Im dum ebrijing garram kainbalawan filing.

¹⁴Im album detlot pipul hu abumbat trabul, en im lidimap detlot pipul hu buldan.

¹⁵Ebrijing laibala luk langa yu blanga album olabat, en rait taim yu gibit olabat daga.

¹⁶Yu gibit olabat naf ebrijing, en yu meigim olabat sedisfaid brabli.

¹⁷YAWEI oldei dum ebrijing raitwei, en im dum ebrijing garram kainbalawan filing.