Ola Saam 141:3-9

³YAWEI, holdim main mawus, en nomo larram mi tok nogudwei.

⁴Nomo larram mi blanga wandi jinggabat blanga dum nogudwan ting. Nomo larram mi weistimbat taim dumbat nogud ting garram ola nogudwan pipul. Nomo larram mi joinin en dagat daga brom detlot nogudbala pipul.

⁵Wen detlot pipul hu jidan trubalawei langa yu streitinimap mi, en panishim mi garram det raitwei blanga yu, ai garra larram olabat. Mi oldei prei blanga stapam ola nogudwan ting weya ola nogudbala pipul oldei dumbat.

⁶Wen YAWEI garra tjakamdan ola big bosmob brom det haiwan rok, ola nogudbala pipul garra sabi tharran main wed bin trubalawan orait.

⁷Blanga olabat boun garra leidan ebriweya langa greibyad, jis laik ola ston weya sambodi bin smeshimap.

⁸YAWEI, ai luk langa yu. Yu main boswan God. Mi kaman langa yu blanga kipum mi seif. Nomo larram enijing kaman en ardim mi.

⁹Maindimbat mi brom detlot nogudbala pipul hu wandi trepam mi garram ola nogud ting.