Ola Saam 136:4-9

⁴Im dum ola brabli klebabala ting weya nobodi iya kaan dum. Trubala, im laigim wi tudei en olagijawan.

⁵Im na sabi ebrijing brabliwei. Lagijat na imbin meigim det skai. Trubala, im laigim wi tudei en olagijawan.

⁶Imbin meigim det graun jidan ontop langa det solwoda. Trubala, im laigim wi tudei en olagijawan.

⁷Imbin meigim ola lait. Trubala, im laigim wi tudei en olagijawan.

⁸Imbin meigim det san shain deitaim. Trubala, im laigim wi tudei en olagijawan.

⁹Imbin meigim det mun en ola sta shain naitaim. Trubala, im laigim wi tudei en olagijawan.