Ola Saam 136:1-7

¹YAWEI det trubala God im gudbala langa wi. Dumaji im gudbala langa wi, blanga tharran na wi garra gibit im theingks. Trubala, im laigim wi tudei en olagijawan.

²Im na det brabli haibala God. Blanga tharran na, wi garra gibit im theingks. Trubala, im laigim wi tudei en olagijawan.

³Im na det bos. Dumaji im bos, wal wi garra gibit im theingks. Trubala, im laigim wi tudei en olagijawan.

⁴Im dum ola brabli klebabala ting weya nobodi iya kaan dum. Trubala, im laigim wi tudei en olagijawan.

⁵Im na sabi ebrijing brabliwei. Lagijat na imbin meigim det skai. Trubala, im laigim wi tudei en olagijawan.

⁶Imbin meigim det graun jidan ontop langa det solwoda. Trubala, im laigim wi tudei en olagijawan.

⁷Imbin meigim ola lait. Trubala, im laigim wi tudei en olagijawan.