Ola Saam 135:1-21

¹Preisim YAWEI det trubala God! Preisim im neim, ol yumob hu wek blanga YAWEI.

²Yumob hu wek deya insaid langa det haus blanga YAWEI wi God,

³preisim im dumaji im gudwan. Sing song blanga preisim im neim dumaji im jidan kainbala.

⁴Imbin pikimat Jeikob en ola Isreil pipul blanga im ronselp.

⁵YAWEI im God blanga wi, en ai sabi im det brabli haibalawan God. Im mowa haibala langa najalot drimin.

⁶Im dum wanim im wandim langa hebin en langa dijan kantri en insaid langa solwoda raitdan langa bodam.

⁷Im bringimap rein klaud brom olaran langa ebri kantri. Im meigim laitining blanga ola bigwan rein, en im bringimap win brom det pleis weya im jidan.

⁸Langa det kantri Ijip imbin binijimap ola men en ola enimul hubin bon fes.

⁹Deya na imbin dum ola klebabala ting blanga panishim det king en ol im brabli haibala wekinmen olabat.

¹⁰Imbin binijimap detmatj pipul brom najalot kantri, en ola brabli strongbala king,

¹¹det King Saihan blanga det Emarait traib, en King Og brom Beishan, en ola king langa det kantri gulum Keinan.

¹²Imbin gibit ola kantri blanga olabat langa ola Isreil pipul, detlot pipul blanga im na.

¹³YAWEI, pipul garra oldei tok yu jidan God. Brom ola femili tudei raidap langa ola femili hu garra jidan bambai, dei garra oldei jinggabat blanga yu.

¹⁴YAWEI garra oldei lukaftumbat im pipul olabat. Im garra oldei jidan kainbala langa im wekinmen olabat.

¹⁵Ola pipul brom najalot kantri bin meigim ola drimin sheip garram gol en silba. Deibin meigim garram olabat ronwan bingga.

¹⁶Detlot drimin sheip garram mawus bat dei kaan tok, en dei garram ai bat dei kaan luk.

¹⁷Detlot drimin sheip garram irriwol bat dei kaan irrim, en dei nomo blowin.

¹⁸Larram ol detlot pipul hubin meigimbat olabat en hu trastimbat olabat, jidan nomo garram eni pawa wulijim detlot drimin sheip.

¹⁹Ola Isreil pipul, preisim YAWEI! Ola wekinmen blanga God, preisim im.

²⁰Ol yumob Libai klen, preisim YAWEI. Ol yumob hu weship im, preisim im du.

²¹Preisim YAWEI langa Saiyan deya langa Jerusalem weya im jidan. Preisim YAWEI det trubala God!