Ola Saam 129:1-8

¹Det serramonimen bin sing, “Yumob Isreil pipul, yumob garra sing blanga hau wi enami olabat bin oldei gibitbat wi adtaim brom wen wibin yang.”

²En detlot Isreil pipul bin sing, “Brom wen wibin yang wi enami olabat bin oldei gibitbat wi adtaim, bat dei nomo bin bidim wi, najing.

³Deibin beldimbat wi en meigim dipwan mak langa wi bekboun, jis laik det fama weya im kadim det graun blanga growimap daga.

⁴Bat YAWEI oldei dum wanim rait, en imbin meigim wi fri brom jidanbat prisana blanga wekwekbat blanga ola nogudbala pipul.”

⁵YAWEI, wi askim yu blanga bidim ol detlot pipul hu nomo laigim yu serramoni pleis langa Saiyan, en yu meigim olabat sheim miselp en ranawei.

⁶Meigim olabat jidan jis laik sid daga gras weya grogro ontop langa haus en im draiyap bifo im gro bigwan,

⁷en nobodi kaan hipimap en deigidawei eni sid daga.

⁸En dumaji nobodi garra gajimbat eni sid daga wal nobodi kaan tok dijan, “Larram det gudbalawei blanga YAWEI jidan garram yu.” En nobodi kaan ensim, “Wi garra gudbala langa yu garram det neim blanga YAWEI.”