Ola Saam 119:93-100

⁹³Ai nomo wandi libum detlot wed weya yubin titjimbat mi, dumaji olabat meigim mi jidan gudbalawei.

⁹⁴Mi blanga yu YAWEI. Yu seibum mi, dumaji mi oldei teiknodis langa ol yu lowa.

⁹⁵Ola brabli nogudbala pipul weidabat blanga kilim mi ded, bat ai garra kipgon jinggabat ol yu wed.

⁹⁶Ai sabi ebrijing weya jidan tudei garra binij, bat yu lowa im jidan brabli trubalawan en kaan neba binij.

⁹⁷Trubala mi laigim detlot lowa blanga yu brabliwei. Mi oldei jinggabat detlot lowa blanga yu.

⁹⁸Dumaji ai garram yu lowa blanga shoum mi wanim blanga dum, im meigim mi sabi brabliwei, mowa den main enami olabat. Dei nomo sabi enijing.

⁹⁹YAWEI, ai sabi mowa den main titja olabat, dumaji mi jinggabat wanim yu oldei titjimbat mi.

¹⁰⁰Mi sabi mowa den detlot ol pipul, dumaji mi oldei duwit langa detlot lowa blanga yu.