Ola Saam 119:158-175

¹⁵⁸Wen mi luk langa detlot pipul hu nomo bilib langa yu im meigim mi fil brabli nogudbinji, dumaji olabat nomo bulurrum detlot lowa blanga yu.

¹⁵⁹Yu luk haumatj mi laigim detlot lowa blanga yu YAWEI. Wen yu laigim pipul, tharran kaan tjeinj. Im olagijawan na. Yu shoum yu laigim mi en yu seibum mi.

¹⁶⁰YAWEI, yu wed im trubala, en ebrijing weya yu titjimbat pipul garra jidan olagijawan.

¹⁶¹YAWEI, ola brabli haibala pipul nomo gibit mi feyago nomo garram risan, bat brabliwei mi rispek yu lowa.

¹⁶²Dumaji blanga ol yu pramis mi brabli gudbinji, jis laik sambodi hu gudbinji brabliwei wen im faindim samting brabli gudwan.

¹⁶³Brabliwei ai nomo laigim detlot pipul hu dalimbat laiya, bat mi laigim ol yu lowa.

¹⁶⁴Sebenbalataim ebridei mi tok theingkyu langa yu dumaji wen yu jadjim pipul yu gibit olabat feyago.

¹⁶⁵Detlot hu laigim yu lowa, olabat jidan brabli gudbalawei. Najing kaan meigim olabat go nogudbalawei.

¹⁶⁶YAWEI, mi weit langa yu blanga seibum mi. Mi dum wanim yu dalim mi.

¹⁶⁷Mi duwit langa ol yu lowa, en mi laigim olabat insaid langa main hat.

¹⁶⁸Mi lisin en bilib blanga ol detlot lowa blanga yu en langa wanim yu tok. Yu sabi ebrijing weya mi dum.

¹⁶⁹YAWEI, mi jingat langa yu blanga album mi, Yu meigim mi sabi yu wed brabliwei jis laik yubin pramis.

¹⁷⁰YAWEI, irrim main preya. Seibum mi jis laik yubin tok langa yu pramis.

¹⁷¹Ai garra oldei preisimbat yu, dumaji yu oldei lenimbat mi blanga ol yu lowa.

¹⁷²Ai garra sing song blanga ol yu lowa, dumaji ol yu lowa im trubalawan, nomo garram enijing rong.

¹⁷³YAWEI, jidan redibala blanga album mi, dumaji mi bulurrum detlot lowa blanga yu.

¹⁷⁴Mi oldei wandim yu blanga seibum mi brabliwei, YAWEI. Detlot lowa blanga yu meigim mi jidan gudbinjiwei.

¹⁷⁵Larram mi jidan laibala, wulijim ai garra oldei preisim yu. Larram detlot lowa blanga yu album mi.