Ol Provep 31:1-31

¹Go agaa-re King Lemuel-na agaa. Agime agaa mana loa epe kone minalo lakesa.

²Nina naaki nere nina madiawa-pulu neme ne raaname waru ome. Neme Gote agaa misu rabu ni gisa-da madisu. Neme ake lano ya?

³Neme ona meda nayoloa money page nakaloa nena puri dia yalia. Gore akoloya king-nu ma-oyaeme-daa go agaa lagialo.

⁴Lemuel-yo king nimi ipa waini na-nape. Nimumi bia nape kone nasalepape.

⁵Gore nimimi ipa agu nalimi raburi rekana agaa ruguloa mo aa naraanu-para epea meda mada napalimi.

⁶Pa bia-para waene lapo-re omape onaa-para kedaa adaapu rini onaana nape eta yade.

⁷Go piane onaare ipa nalame omalimiri pa nalimina. Yapare nimu naraa pimi onaa oyae rudu yoa kedaa riapere kone rugulaawa nalimina.

⁸Kedaa madaa nariape kepele pi onaare rabameape agaa lape. Goa pua mo naraanumi koso teme rabu raba meape-na puri waru pabape.

⁹Neme koso te rabu mogo onaanu epe-rupa redepoya pagape. Goa pua neme mo naaranu raba mua surubape.

¹⁰Go yapare aame ona epe kone-i rumaatalo pe? Ora yapare kalai pua asa palia. Go piaene ona-na yotore gol-na yoto pea-rupa mada yade.

¹¹Go piaene ona nipuna aanimi mo onana pea luabu epea peada aba adea. Goa pea-pulu ona-me nipu raba mealia rabu mo aa nipu oyae ora adaapu salia.

¹²Go ona-me aani-para oro yalo epea agu pea.

¹³Nipumi laplap wariape ope adaapu page pusua laplap adaapu wari pea.

¹⁴Nimu luabumi eta ora adaapu waru imi. Gore akolo-ya? Go oname eta ora su adaalu-para mea epea. Gore mo adaa sipi-numi eta madita pemede-rupa mada mea epea.

¹⁵Epe onamere yapi abi nane aina eta nipuna onaa raapu nape aba yawea. Goa puare nipuna kogono onana pape kogono robo su kata.

¹⁶Mo puri pane oname su kabolalore su ora waru adoa kabea. Goa pua orope mone muare repena waene maapu kaboa poaaya.

¹⁷Nipu oro meda gime naomea oro yalo puri paloa kogono puaaya.

¹⁸Nipuna labana wiki ora waele waru rubia epeta rabu laba waru roaaya. Go laba roaina ribaa ruma rumane nipuna pea bisinisi raayo pua epe ta-daa adea.

¹⁹Go piaaene oname ope waria nipuna bipa laplap rabuta.

²⁰Gore nipumi mo naraa onaa adoa oyaenu rudu teme rabulu kata.

²¹Gore yai radaki adaa lopea rabu page nipuna aani nogo naaki yada dia kone ia. Gore akolo ya? Nipumi mo laplap ora epe pepena pi yae rabuta-pulu yada dia kone ia.

²²Goa pua nipuna ada-para sape balaket oyae page nipuna bipa rabuta-pulu nimuna ada-para epeta. Goa pua laplap kane-para yakopi lapo rata mua nipuna yamape oyae warita.

²³Gore mo adare-para piri aa mudunumi nipu adaa bi kateme. Nipuna aani page mo aa mudu meda yapulu goa peme.

²⁴Oro yalo mo oname epe mamina waria aako lete page waru warita. Goa pea-pulu mo bisinisi peme onaame epa kabeme.

²⁵Nipuna mogo pea kogono madaa mo ona ora epeta kone sua mo ona kone mapiraawa go piane ona yade teme. Go orope epaliade yaere nipu palame naomea.

²⁶Nipumi onaa kogono mogeatalo palia-dare pawasi agaa loa pea. Nipuna ta agaa luaburi epe kone-para makuae yae lapo ora waru rubita.

²⁷Nipuna ada-para oyae surubolalo palia raburi gime na-omea. Goa pua epe puri pane kogono pea.

²⁸Ora epeta ora epeta gore niaana ama teme. Mo ona nipuna nogo naakimi goa teme. Nipuna animi ona-na bi ora waru minasaawa goa ta.

²⁹Niaana taun-para page niana oge adarenu-nini page go piane ona adaapu pimi: Pare neme go ona luabu rabuaye teme.

³⁰Ona padaneme niaa epe rede pi agaa lagialia pare nipuna peare rado piane. Ona ora epe yalia page pinawa. Nipu oro yalo gorupa mada napitia. Goa pea-ga niaame Adaa Aa-na rolo-para pia onana bi minasamina.

³¹Niame ona nipuna epe kogono adoa nipuna epe kone page rumaawa nipuna bi minasaeme.