Ol Provep 28:9-28

⁹Aa medame rekena i agaa narataliadare Gote-me go aana beten napagalia. Gote-me go betene pageare pugu waru pugu pea-pulu mada napagalia.

¹⁰Aa medame epe aa meda makiraatalo paliare nipuna paliade waeame nipu wala mapiraalia. Go yapare aa meda nipu wae yae napi pawa aaliade-daare Gote-me go aa nipu epe epe yaenu mada katea.

¹¹Oyae adaapu i aanu nimu ora makuae yae ima kone imi pare naraanu kone waru sua amope aanuna kone makuaaeme.

¹²Epe redepone aanumi nimuna kantri surubolalo peme raburi onaa luabumi go aa madaa ranaame waru omeme. Wae aanumi mo kantri surubeme raburi onaame palaa omoa nipu kaledeme.

¹³Aa medame nipuna wae yae pawa kudiripu pa ina kone sua piraliare go aame epea napea. Go yapare aa medame nipuna wae-yae luabu lapedepealia-dare Gote-me go aa nipu odome omoa raba mealia.

¹⁴Gore aa medame Adaa Aa madaa kone rulaawa piraliare nipu raana waru omoa pirina. Go yapare nipumi Adaa Aa-na agaa rasua waeanu pu piraliare nipumi waea kedaa mu-aalia.

¹⁵Gore kantri surube aame waea pua naaranu rabuaniatalo paliare nipu ota. Gore mo mena laion nipumi e-adaa puri palo ta-rupa para mena beame eta asapea-rupa mada ta.

¹⁶Gore mo kantri-na surube aa nipu epe kone na-i yaliare onaa luabu pa rabua tua ma-oyatalia. Go yapare adare surube aame onaa luabuna oyae nayotea pare ma-oyaape madaa gime omaliare nipu adaalupu epe-rupa pa piralia.

¹⁷Aa medame aa yago tumaomalia-dare go aa nipuna tapa poaawa kedaa mealia. Goa pua nipu ora epe-rupa napiri omalia.

¹⁸Gore aa medame epe kone epe pora ratua aaliare nipu epe redepoya piruaalia. Pare waenupu aalia aare aipapulu oyo tua alupalia.

¹⁹E-poae aa yaliare nipuna maapu-para eta ora adaapu su aalia. Kogono radore waru na-i mada pama to tu ruboa pu aaliare nipu wae-rupa naraa pirualia.

²⁰Aa medame redeponea rataliare Gote-me go aa nipu epea palia. Aa meda nipu mone adaapu aipapulu sano kone saliare Adaa Aa-me go amope nipu epena kone na-ia. Dia mo amope aa nipu kedaa waru katea.

²¹Na-epeta koso madaa aa meda rabamua aa meda wala malopaliare gore ora na-epe ta. Goa pea pare aa medaloma waeanu pulalo managola pimi pare mo nimu omeme pua rabameape mone ogesi kateme rabu epe-rupa giala kone na-imi.

²²Aa meda nipuna yaenu o waru yoa aalia-daare aipapulu amope alia. Pare nipu orope aa naraa piralua kone naia.

²³Gore neme aa meda maredepoyali nipumi ranaame waru omalia. Go palipide-a luabumi mo omeme kone luabu rabuaniaaya.

²⁴Gore aa medame agi araana oyaenu paake noa gupa ta. Neme go oyaenu nameawa ta. Paake nameawa ta agaare gupa aa medalomame oyaenu ma-oyaame-rupa mada yade.

²⁵Aa meda nipu oyae yoloa salua kone saliare aa adapumi go madaa ratu yawalimi. Go yapare aa medame Adaa Aa madaa kone rulaliadare go aa nipumi epe-rupa pirua oyae adaapupe salia.

²⁶Aame nina makuae oyaeme nipuna bipa madaa raba mealia kone ia pare mada dia. Go yapare aa medame epe redepone kone ratu aliare go aa nipu epe-rupa piralia.

²⁷Aa medame aa naraanu oyae pa ode kateare go aa nipu oyae mada narudutea. Go yapare aa medame mo naraa onaa adoa oyaenu naruma kateare aa nipu ota teme.

²⁸Wae agaa lo wae pora rati aanumi kantri surubalimi-dare onaa nimu kalodoa piralimi. Pare go wae aa mudunu omalimi raburi epe kone su epe pora rateme onaa nimu epe-rupa pirua surubeme.