Ol Provep 27:11-21

¹¹Naa naaki neme epe kone luabu mua epe pora luabu ratali-dare ne madaa epe kone salua. Goa pua aa medame nipara pa mariae agaa teadare neme nipuna agaa mada abutoa.

¹²Epe kone i aamere gore nipumi ora go-rupa makuaaya. Kedaa nipu mada epolalo palia-daare gore nipumi aipapulu mapakeaalia. Goa pea pare epe kone na-i aare gore mo pora wae i-para pea rabu page go wae yaeme nipu ora mea rabu ora aipapulu kedaa mu aaya.

¹³Aa medame mo aa yagona rudu neme abulalua loa wala naabutea-daare gore nipu wea aa yade. Go yapare mo nepara yaa agaa robali aame nepara rudu meda giaina tea rabu nipuna ta yaa agaa aba ade-ga neme mo rudu abuna kone sua oyae meda puri paboa meape.

¹⁴Gore neme rui puri pabo loa nena adami aa-para ribaa reko te-dare nipu-para wae agaa temede-rupa mada te.

¹⁵Aa medana ore agaa rado rado adaapu ne ona yaliare gore ada runane yai itipa-ta pogo pogo loatade-rupa mada pea.

¹⁶Goa pea-pulu nipuna aanimi go agaa kone luabu magimaape-rupa mada dia. Goa peare aame poripu page wabala pepenini page ripinaalua kone sua pemedea-pea.

¹⁷Nimumi puri pane aeyane nepo papere wala aeyane yagome nepo peme. Go peme-rupare aa yago medame mo aa yago rabamua epe kone masaaya.

¹⁸Aa medame repenana ini etalia rabu go repenana ini raloa nalua kone salia-dare go repena ora waru surubalia. Aa medame nipuna surube aa ora waru surubalia-daare go surube aame mo aa nipuna bi ora waru minasaalia.

¹⁹Aa medame mo ipa ini-para adainaalia raburi nipuna ini agaa nipuna bipa adea. Go-rupa aa medame nipuna pea rayo waru adoa rumaliare nipu gopiane aa yadelo makualia.

²⁰Gore aa adaapu omalimi page pinawa. Mo aa tapa luabu mada narulatabalia. Go-rupa mada nipuna kone-para ia yae luabu mada napu kiritalia.

²¹Repena sulaame silipa golonu roa rakepeta. Go rupa mada go aa-re epe aa yade wae aa yade lo aba ademe. Epe aa yaliare nipuna bi minasaeme.