Ol Provep 19:18-29

¹⁸Gore nena naakimi waea pua pupitagi naliare neme nena naaki mana lape. Mana te raburi nipumi epe pora ratalia. Go yapare neme mana lake pupitagi pa nalaaina gimaliri gore nena naaki riaa omenawa kone sua pe.

¹⁹Gore aa medame rono omoa nipumi waea paliare nipuna go wae yaena yoto mulalo pea. Go yapare neme nipu rabamua nipuna kedaa mea riali-dare wala orope page nipu rabameaina kone agu sua palia.

²⁰Go yapare aa medame ne maredepo yawoa epe kone gina kone sali-dare orope ne epe kone waru meali.

²¹Aame kone adaa pua sua oyae adaapu palua kone ia pare Adaa Aa-me pina kone ia-rupa luabu mada palia.

²²Aanumi goa loa lo rogaa i agaa madaa puri palo aaeme. Gore naraa aa apere ota pare pa epeta. Go aa epe-yaliare mo yaa agaa ne aa ora rabuniaaya.

²³Ne Adaa Aa-na rolo-para piralidare ne epe-rupa pirape yae mea gialia. Goa palia rabu ne madaa wae yae meda na-epalia rabu ne oro yalo epe-rupa mada pirali.

²⁴Kiaa raakepene aa nipu ki arota-para pagoa pa pirualiare mo eta yawo i meape yala potea. Go page kimi musaawa eta mea nape page yala potea.

²⁵Wae pupitagi ne aa aipuyame tali-daare kone waru na-i aame adoa mada makuaalia. Goa palimi rabu epe kone aba ratua palia. Go yapare neme epe kone sua aae aanu maredepo yali rabu nimuna makuae yae ora madaa popalia.

²⁶Naakimi aara ratu yawoa nipuna agi ada-para pane rata saliare mo nipuna onaa nogo naaki rayo yala mea kataa.

²⁷Naaki neme epe agaa waru gimaliri kone nai pa maeyae aanuna kone ratua ali.

²⁸Waea-pi aame koso witnes pulalo epaliri go aa nipumi mo koso ma-oyapena epea. Go aa nipu mada waea luabu rubita.

²⁹Wae agaa lo wae pora pameme aanuri nimu wae yoto mealimi. Goa pua wae pora ratua pupitagi neme aanu nimu aipayame kudu talia.