Ol Provep 19:10-24

¹⁰Epe kone na-ia aa nipumi mone oyaenu adaapu su aayare na-epeta. Naara piri kogono naakimi mo aa mudu wala surubea page ora rado yade.

¹¹Epe kone i aa nipumi kone gupa ia. Nipu epe kone ia-pulu ratu ratu yawape kone aipapulu naia. Goa pua aa medame nipu-para waea pea page gimea.

¹²Gore mena kiraa-me e waru loa aa mudu king pia aa ratu waru yawea. Go yapare ratu yawe onaa rabamulalo paliare yai ipua maapu-para eta naape yae ma-opaaya-rupa mada palia.

¹³Naaki meda nipu epe kone nasaliare go naakimi nipuna aaraa kedaa waru mea kata. Gore aa medana oreme ratu yawoa agaa adaapu loaliare nipuna ada runane itipata pabea-rupa tea.

¹⁴Niaana aama aapanumi mone oyaenu rumaa gialimi pare Gote nipumi epe kone i ona mea gialia.

¹⁵Kiaa rakepene aanu nimu oro yalo pama piruaawa reaeme omoa u keme waru loa patala pu aaeme.

¹⁶Aame Gote-na pora ratua epe-rupa pitiare naoyalia pare nipu ora epe-rupa piralia. Go yapare aame Gote-na epe kone madaa masa rilaawa waea-nu paliare nipu omalia.

¹⁷Gore neme aa naara meda odome-omoa oyae katalo pali-daare mo Adaa Aame ne madaa rudu ainalo pe. Goa pali-daare orope Adaa Aa-me nena rudu go abutea.

¹⁸Gore nena naakimi waea pua pupitagi naliare neme nena naaki mana lape. Mana te raburi nipumi epe pora ratalia. Go yapare neme mana lake pupitagi pa nalaaina gimaliri gore nena naaki riaa omenawa kone sua pe.

¹⁹Gore aa medame rono omoa nipumi waea paliare nipuna go wae yaena yoto mulalo pea. Go yapare neme nipu rabamua nipuna kedaa mea riali-dare wala orope page nipu rabameaina kone agu sua palia.

²⁰Go yapare aa medame ne maredepo yawoa epe kone gina kone sali-dare orope ne epe kone waru meali.

²¹Aame kone adaa pua sua oyae adaapu palua kone ia pare Adaa Aa-me pina kone ia-rupa luabu mada palia.

²²Aanumi goa loa lo rogaa i agaa madaa puri palo aaeme. Gore naraa aa apere ota pare pa epeta. Go aa epe-yaliare mo yaa agaa ne aa ora rabuniaaya.

²³Ne Adaa Aa-na rolo-para piralidare ne epe-rupa pirape yae mea gialia. Goa palia rabu ne madaa wae yae meda na-epalia rabu ne oro yalo epe-rupa mada pirali.

²⁴Kiaa raakepene aa nipu ki arota-para pagoa pa pirualiare mo eta yawo i meape yala potea. Go page kimi musaawa eta mea nape page yala potea.