Ol Provep 18:11-24

¹¹Amone aanu nimuna moneme nimu kutapua ora epe-rupa surubalia kone imi. Mo ada kagure puri-palo aya-rupa mada kone imi.

¹²Gore aa meda nipu pupitagi noa nipuna bi minasaliare orope nipu oyalia. Nena bipa ne rabu aniawa epe pora narataliri ne epe adaa bi mada nameali.

¹³Aane waru lobapaina pirua agaa aba waru pagoa orope agaa abulape. Neme goa napaliri wae maeyae kone sua pe-pulu orope ne yala pote.

¹⁴Aa meda nipu yaina omoa yapare kone puri paboa piraliare go yaina mada perekealia. Mo aa nipuna kone oyaliare go aa nipuna kone wala akepua ma-epeaalia pae?

¹⁵Aa meda nipumi epe kone sua nipumi oyae rado rado waru makuaatalo pea yae luabu waru makuaaya. Go page aa medame agaa mana teme rabu nipumi aane lobapa ina pirua mogo agaa rayo waru pagea.

¹⁶Gore neme adaa aa meda raapu agaa talo pali-daare neme nipu pa ode kalape yae meda aba ripinape. Goa pali raburi neme nipu mada adali.

¹⁷Aa meda nipu kosona ini-agaa madaa aawa agaa teare nipu koso wini pape nonapiaene agaa tea. Go yapare pa aa meda agaa waru maredepo yainalo agaa mealia-dare go koso apimi wini palia palo marea.

¹⁸Aa laapona rikiraane koso aapimi ora wini palialo abi nalapaeme raburi apimi wini palia pala marea teme.

¹⁹Nena ame meda wae kone saliri nipumi go kone mea rogasua ne raaname na-omalia. Gore onaa medalome mo ada kagurena pora gape poaeme-rupa mada nimu runane pope-rupa maralimi. Gore mo aa lapo nipu yada pape agaa loa ki namealipi. Nipuna lo robaa padane-para mada nasalipi. Adaa poragape garulaawa aana kerepo pora rugutade-rupa mada. Goa palipi-pulu nipu ada runane mada napalia.

²⁰Neme agaa epe-rupa loa redepone-rupa te rabu nena lo robaa-para raana waru palia.

²¹Nena tede agaame onaa epe-rupa mapiraali. Nena agaame agu onaa ma-oyaawa onaa maepeaalia. Goa pe-pulu neme epe agaa lape madaa raname omalimi ne epe-rupa mada pirali.

²²Neme ona meda rumali-daare gore ora epealia. Goa paliri Gote-me page lo robaa gua epeta kone salia.

²³Naraame amope oyae pawa agaa mea. Go yapare aamaame agaa puri palo loa abuta.

²⁴Gore aa meda nipuna adami aa adaapu aaliare go aa nipu oyalia. Go yapare aa meda nipuna adami aa ora epe rado piaene meda alipiri go aa lapo nipu lo rabaa waru sua nipu lapo ameaya-rupa alipi.