Ol Provep 16:6-32

⁶Aa medame Adaa Aa mada raana waru omo nipu raapu pogatu piralipiri gore Adaa Aa nipumi go aana wae yae luabu mea rubalia. Aa medame Adaa Aa-na agaa ratua piralia raburi Adaa Aa-me pupitagi naape kone namasalia. Goa pua nipumi oyae luabu kone rugulalia.

⁷Gore aame mo Adaa Aa nipuna raana omea kone luabu ratua nipuna iaanu raapu epe kone sua piralia-rabu Adaa Aa-me rabamua epe onaa raapu mapiraalia.

⁸Neme oyae ogesi sa awa Adaa Aa ratulalo pali-ri mo mone akore i mi onaa page rabuawa wae pupitagi no aaya aa page rabunialia.

⁹Niaana pape yaenu mada kone penaloa pulalo pema pare Adaa Aa nipumi niana pamulalo pema yae adoa maredepo yaaya.

¹⁰King pia aa mudumi Adaa Aa-me laketa agaa onaame pagenalo laketa rabu pageme. Koso pagoa mo agaa mea rumape raburi ora epe redepone koso pagoa mea rumaalia.

¹¹Adaa Aa-me oyae waru mua epe-rupa redepoya rumainalo kone raapu kata. Goa pua nimumi onaanu makirari napinalo pea.

¹²Aa mudu king piame wae pupitagi kone luabu gimoa epe redeponea pinalo peme. Gore mo gavman pimi aanumi epea palimi raburi nimu puri mua epe-rupa pitimi.

¹³King nipumi ora agaa ria-teme onaa raaname omea.

¹⁴King nipumi aa meda raatu yawaliare go aa nipu tumaomalia. Go yapare aa meda nipu epe kone i yaliare mo king nipu epe kone mealia rabu lo robaa maepealia.

¹⁵Gore king nipumi aa meda epe lo rabaa kaloa epea palia-re nipumi epe kone sua go aa epe-rupa mapiraalia. King-na peare yaa madaa i yai lopoa suamaa ope-yaenu eta kata-rupa mada pea.

¹⁶Neme epe kone makuae yae luabu mealiri gol-para silva go yaenu luabu ora rabuaniaye.

¹⁷Epe onaanumi wae yae ratape gimoa waru adoa pameme. Aa medame nipuna pora waru adoa epe-rupa pamualiare nipu ora epe-rupa piralia.

¹⁸Wae pupitagi noa nena bi minasaawa ne apiyapa te-daare ne wae-rupa malopaalia.

¹⁹Gore aa meda nipuna bipa nipu naara kone sua nipuna bi rabuaniaawa pitiare pupitagi ne aanuna raana meme kone page rabuaaya.

²⁰Aa medame ne mana-teade agaa waru aina madu pagoa piraliare ne epe-rupa pirali. Aa medame Adaa Aa madaa kone rulaliare nipu raana adaa mealia.

²¹Aa numi makuaeme. Aa meda nipumi epe kone waru makuaalia-re mo teme agaa waru ruma adalia. Gore nipumi epe kone sua agaa epe-rupa ne aa yaliare aanu luabumi nipuna agaa pagolalo raana waru omalimi.

²²Gore aa meda nipu epe kone i yaliare go aa nipu ipa laipi kagaa pirape yae mua piri aa-rupa piralia. Wae kone imi aanu-ri nimuna go pemeame wae maeyae aa piralia. Goa pua nipuna bipa nipu ma-oyaalia.

²³Epe kone i aa nipumi kone aba rumaawa epe kumapi agaa orope teme. Goa pea-pulu nipuna agaa pagolalo raana waru omoa pageme.

²⁴Epe agaa-re ora epe redepi alubi apaa-para mena midi-lapome adea. Nipu ora rede waru pua onaa luabu puri kata.

²⁵Aa medalomame nimuna pema yae luabu epeta kone sua pora pameme pare ota. Goa pama-pama puare orope nimu omalimi.

²⁶Kogono peme nakinumi makuaeme. Nimu kogono waru na palimare nimu eta diayalia kone sua kogono waru peme.

²⁷Wae au peme onaa luabu maoya tulalo pora rado rado asapeme. Nipuna agaare repena sulaa ralae nona pua mo onaa luabu ma-oyaawa rabea.

²⁸Waea pi aame-re onaana rikiraane wae bomo agaa mea lopawa nimu yada-yada waru mapaya. Makirae agaa-ta aame nipuna adami aanu raapu yada makepeaawa rugulala paya.

²⁹Yadapi aa-mere nipuna adapi aa omeme pua wae pora-para yola pea.

³⁰Aa medame aa meda-para ini adupi adupi paliare neme mada makuali mo aa nipumi waea pulalo pea. Aa meda nipu agaa na-teare nipumi waea pulalo pea. Gore mo nipuna ratu yawe kone muboa waea pulalo pea.

³¹Yomagae nimuna kama iri adoa nimumi aba makuaeme. Go yomagae aanu nimumi ora epe kone su epe pora rateme-pulu go kone mada kamaa aya kone-imi. Goa kone imi rabu nimu adaa bi meme.

³²Ratu ora aipapulu nayawea aamere nipu epe kone sua pea. Go konere puri paloa yada wini peme-rupa mada. Aa medame nipuna bipa nipu waru surubaliare ada kagure meda yada naminabaeme-rupa mada pea.