Ol Provep 15:1-15

¹Aa medame ne-para ronopi agaa meda tea-dare nipuna agaa kumapimi abulape. Goa pali rabu nipuna ratu yawe kone dia yalia. Go yapare neme aa meda-para ero agaa loa yala mapaliri mo aame ratu adaa yawoa ne-para ratu waru yawalia.

²Aa medame epe kone sua epe agaa teare nimumi go aa-na kone makuae yae ora epeta loa raana omalimi. Go yapare aa meda epe kone na-imi agaa tea-dare go agaa re nai agaa ta.

³Adaa Aa-me su luabu-para pea yae rayo ada makuaaya. Nipumi epe aa wae aa luabu ado kiritea.

⁴Aa medame epe agaa onaa luabu laketa rabu go agaa pageme onaa luabu nimu laipi kalape repena nonapina agaa pagalimi. Go yapare aa medame onaa-para wae agaa-teare onaa luabuna kone ma-oyalia.

⁵Aa meda nipu epe kone na-saliare nipuna aapana agaa rasita. Goa pea pare pa aa medame nipu agaa loa maredepo yaina gimaliare go aa nipu ora epe kone mealia.

⁶Epe aanu nimu luabuna ada-para oyae ora adaapu imi. Wae aanu nimuna mone-me nimu kedaa ora adaapu mea kata.

⁷Epe kone imi aanumi onaa luabu epe kone kateme. Go yapare epe kone rudu teme aanumiri goa page napeme.

⁸Adaa Aa-me waea peme aanuna opa kateme yae luaburi ora gimea. Pare epe redepone aanumi teme betene raana omoa pagea.

⁹Adaa Aa-me wae aanumi peme yae luaburi ora raaname naomea. Epe aanu nimumi agaa ratua peme rabu raaname omea.

¹⁰Aa medame epe pora minarepaliare wae yoto mealia. Aa meda nipu maredepo-yaina lape gimaliare nipu omalia.

¹¹Adaa Aa-me aba ome onaa luabu pimi-para ado kiritea. Go su amaa onaa niaana ima kone page luabu ora waru aba ado kiritea.

¹²Aakone i aamere pa aa medame nipu maredepo yaina kone ora na-ia. Goa pea-pulu aa meda-para nipu epe kone gialepa natea.

¹³Gore aa medana robaa-para epe kone saliare nipuna ini agaa-para epealia. Go yapare aa meda nipuna ini agaa-para roke rialiare nipuna robaa-para ota.

¹⁴Epe kone ia aamere puri palo kogono waru pua oyae meape madaa page makuae yae meape mada page kogono pea. Go yapare wae kone i aamere maeyae agaa talo agu pea.

¹⁵Aa meda nipu oyae rudu ta raburi oro yalo kone adaapu sua nipu wae-rupa piruaya. Epe kone sua raana raana-me oroyalo ome aare epe eta nolalo peme rana mada omea.