Ol Provep 11:1-22

¹Adaa Aa nipuna i robo kabula riri peme aanuri oyae waea-rupa rumaawa oyae yolateme. Goa pea pare epea peme onaare raname omoa rumaape epe-rupa popenalo pea.

²Nimuna bi minasaeme aanuri yala waru poteme. Nimuna bi rabuaniaeme aanuri epe kone imi.

³Ora epe aanuri nimu epe pora ora rateme. Pare yaa agaa ne aanuri nimu yaa agaa adaapu teme rabu nimuna go yaa agaame wae yoto mea katea rabu nimu oyalimi.

⁴Epe mone oyae adapu salipare go oyaeme ne omali rabu mada naraba mealia. Go yapare neme epe kone sua epe pora ratu aali-dare ne go su-amaa page adaalupu pirua epe su page meali.

⁵Epe kone imi aanu nimuna epe koneme epe pora mea wata rabu nimu epe-rupa pirua nimu epe kone sua epeanu peme. Goa pea pare waea peme aanu nimuna peme wae yaenumi nimu malopaaya rabu nimu lopeme.

⁶Epe redepone aanu nimuri nimuna epe kone maredepoyaya rabu nimu epe-rupa pimi. Go yapare aanu oyae madaa omeme-pi kone sua wae pora ratulalo peme aanu nimu lopoa wae-rupa pimi.

⁷Wae aanu nimuna purimi oyae luabu pa mealima kone suaaeme. Pare orope nimu omalimi rabu nimumi epe yae meda mada namealimi.

⁸Gore epe aanu madaa kedaa page wae yaenu meda epolalo palia-dare Adaa Aa-me nimu raba mealia-pulu nimu madaa wae yaenu mada naepalia. Goa palia-pulu go wae yae luabu mo pupitagi noaaeme aanu madaa popena tea.

⁹Go page mo wae aanu agaa teme rabu nimuna agaame onaa luabu maoyaatalo peme. Goa palimi pare mo epe aanu nimuna peme-ame nimu rabamealia rabu nimu epe-rupa piralimi.

¹⁰Epe aanu nimuna pirape yae puaa redepota raburi onaa nimu luabu ora raana omoa epe-rupa piruaeme. Go yapare aa padaneme oroyalo waea puawa nipu omea rabu onaa luabumi epe ta kone sua raana omeme.

¹¹Epe redepone aanumi nimuna ada kagure-para epea peme rabu nimuna ada kagure page ora epe-rupa surubeme rabu epe-rupa aaya. Go yapare wae pupitagine aanu mi waea pulalo peme rabu go teme agaame mo ada kagure page ma-oyaaeme.

¹²Aa medame aa medana pi-lawa ero agaa tea-daare go aa nipu maeyae aa-rupa pia. Pa pirua agaa adaapu nalainalo ora epeta.

¹³Aanu medalomame maa agaa adaapu teme-pulu nimuna adami aanuna i kone page pa lapedepeteme. Goa peme pare ora agaa ne aanumi nimuna adami aanu kudiripu i kone nalapedepe teme.

¹⁴Gore mo gavman pimi aa mudunumi onaa luabu epe-rupa maredepoyawa nasurubaliare go onaa rayo oyoa mo kantri page oyalia. Go yapare aanu adaapumi go aanu epe kone epe agaa laketeme rabu epe-rupa maredepo yawa epealia rabu mo onaanuna kantri page epe-rupa aalia.

¹⁵Aa medame yano mua na-abutea rabu neme abulalua te pare wala neme na-abulali-daare ne orope kedaa epalia. Goa palia-ga ne ora epe-rupa pirano kone sali-dare neme mogo yaenu luabu masa rilaawa gimape.

¹⁶Onaame medaloma nimu ora epe ona loa adaa bi kana kone sua gupa peme. Yapare pa pora pame ona onaa medaloma mayala peme. Kiaa rakepene aame mone mada namealia pare kokono waru pe aame oyae adaapu mealia.

¹⁷Gore neme aa meda odome omoa nipu rabamealiri go palideare nena bipa ne-para wala pe. Pare neme aa meda waea pali-daare goame nena bipa ne page go maoyaaye yade.

¹⁸Waea pi aanumi oyae meda mulalo palimi-daare go yaeme nimu ora mada naraba mealia rabu waru yae-da nona napalia. Go yapare aanu medaloma epeanu palimi-daare nimu epe yoto mealimi.

¹⁹Aanu medalomame puri paboa epe kone ratalimiri gore nimu oro-yalo piraama laama pope kone wasupa mealimi. Go yapare waea papena puri pabeme aanuri nimu omalimi.

²⁰Adaa Aa-me oro yalo wae kone imi onaare ora waru gipia. Go yapare epe-rupa aaeme onaare raaname omea.

²¹Gore ora ria wae onaare wae yoto mealimi pare epe onaare mada wadialimi.

²²Gore ona meda ora epe pepena pualia pare nipu kone wae sua pora pamu agaa tea-daare nipumi pama tona pepena paaya. Gore mena ini-kadu madaa mere mudiaawa pepena paawa punitimi mena nonapi pia.