Ol Provep 10:10-28

¹⁰Yaa agaa ne aanumi pupitagi adaapu neme pare pupitagi ne aanu nimu yaa agaa adaapu loa waea peme-pulu nimu bebolo talia. Go pea pare aa medame agaa pename loa onaa mada raba muaya.

¹¹Epe redepone aanuna agaa-re ora epe ipa laipi kata ipa-rupa yade. Go yapare wae aanuna kone pa kudiripu sabaawa onaa mabebola teme.

¹²Lo-robaa wae-imi raburi wae-yae maepaaya. Goa pea pare aa yago meda raana omea aamere wae yae luabu pename ma-opaaya.

¹³Redepone kone i aamere nipuna epe redepone kone agu lapepedepeta. Goa pea pare wae kone imi aanu aipuya-me mea kudu teme.

¹⁴Epe pora ratua epe kone imi aanuri makuae yae waru mua aipapulu nalapaeme. Aa medame yaa-agaa teadare, wae yae aipapulu gopara opapaaya.

¹⁵Gore ada kagure kepo pua imi-rupare amone aanu nimuna yaenumi nimu kuta pua ora epe-rupa pimi. Goa peme pare aa naara luaburi nimu oyae ruduta-pulu nimu aipapulu beboloa oyalimi.

¹⁶Redepone aa-me nipuna yoto-rupare, oro yalo pirama-lama palia. Go yapare wae aa-numiri waea adaapu peme.

¹⁷Go yapare aa medame nipu maredepo yaina kone saliadare, kagaa pirape supara palia. Go yapare aa meda nipu namaredepo-yaeme rabu rada-pia pea aare go epe pora gimea.

¹⁸Aa medame aa yago meda wae kone saliadare, nipumi yaa agaa loa oro yalo waea-pu rabuae aa pename go aaya-da. Go yapare aa medame aa yagona ma-agaa paliare go aa nipu ora maeya aa aaya.

¹⁹Aa medame agaa adaapu loaalia-daare, go aa nipuna agaame page wae-yae yolo rialia. Go yapare aa medame agaa adaapu natea-dare, go aa nipu ora epe kone su ayaa.

²⁰Epe redepone aana agaa-re epe aana silipa-me adea. Go yapare wae aanuna kone-re bebolo-tea.

²¹Epe redepone aa-na agaa-mere onaa adaapu waru rabamea. Goa pea pare onaa epe kone nasalimi-daare go onaa nimu ora omalimi. Akolo ya? Nimuna kone ora oyotea-pulu nimu omalimi.

²²Go yapare Adaa Aa-me niaa oyaenu pama gea. Kedaa kogono-me oyaenu nagialia.

²³Epe kone naimi aanu nimu waea pape mada raana waru omoa pupitagi neme. Go yapare epe kone imi aanuri, nimu epea papena raana omoa epea peme.

²⁴Wae aanuri oyae luabu madaa paalame omalimi rabu go wae yae luabu nimu piri popalia. Go pea pare epe kone rulae aamere oyae luabu mada mealimi.

²⁵Gore wae yapi-di meda go wae onaa repara popolalo palia raburi, gome nimu ora madiayaalia. Gore ipa roa oyae luabu kadepe ritade-rupa goa palia. Go yapare epe-rupa piri onaa-re nimu puri palo eto napi piralimi.

²⁶Gore nena kogono pape aare kiaa rakepene aa nameape. Neme go kogono gi madini aa adali rabu ne marasini ne rabu nena agaa-para rero piade-rupa palia rabu ne gimapalia. Go page nena ini para miru pea rabu poke poke yalade rupa palia.

²⁷Neme Adaa Aa-na pora kurua oro yalo nipuna rolo-para pirali-dare, ne go su-amaaa adaalupu pirali. Go yapare wae aanuri go su-amaa adaalupu napiri ora aipapulu aba omalimi.

²⁸Adaa Aa-na agaa pagoa rati onaamere, Adaa Aa nipuna pea kogono ado-kiritua raaname ora waru omalimi. Go yapare wae aanuri pama surubama pua, nimumi epe yapi di meda mada na-adalimi.