Numperis 2:10-32

¹⁰Iwe, peliörün ewe imwenfel seni mangaku chon ewe ainangen Rupen me ekewe mwich mi chu ngeni lon an kinikin repwe aüetä imwer imw mangaku fän ar filäik lon tettelin en me an mwich. Iten souemwenin ewe ainangen Rupen Elisur nöün Seteur mwän.

¹¹Iteiten ekewe mwän lon än Elisur mwich ükükün faik me wonungeröü limepükü.

¹²Iwe, chon ewe ainangen Simeon repwe aüetä imwer ünükür. Iten nöür souemwen Selumiel nöün Surisatai mwän.

¹³Iteiten ekewe mwän lon än Selumiel mwich ükükün lime me tiwungeröü ülüpükü.

¹⁴Nge chon ewe ainangen Kat repwe nom ünükür. Iten nöür souemwen Eliasaf nöün Reuel mwän.

¹⁵Iteiten ekewe mwän lon än Eliasaf mwich ükükün faik me limungeröü wonopükü lime.

¹⁶Iwe, iteiten chokewe meinisin mi imweimw lon kinikinin Rupen lon tettelin ar kewe mwich ükükün ipükü lime me eungeröü föpükü lime mwän. Ir repwe nom lon tettel nampa ruu lupwen fansoun ar sai.

¹⁷Mürin ekei ruu mwich chon ewe ainangen Lefi mi nom lukalaper repwe sai o eki pisekin ewe imwenfel seni mangaku. Usun tettelin ar nom lon lenier, iei usun pwal tettelin ar sai, eu me eu mwich lon an tettel fän en me an filäik.

¹⁸Iwe, pelilotoun ewe imwenfel seni mangaku chon ewe ainangen Efraim me ekewe mwich mi chu ngeni lon an kinikin repwe aüetä imwer imw mangaku fän ar filäik lon tettelin en me an mwich. Iten souemwenin ewe ainangen Efraim Elisama nöün Amihut mwän.

¹⁹Iteiten ekewe mwän lon än Elisama mwich ükükün faik ngeröü limepükü.

²⁰Iwe, chon ewe ainangen Manasa repwe nom ünükür. Iten nöür souemwen Kamaliel nöün Petasur mwän.

²¹Iteiten ekewe mwän lon än Kamaliel mwich ükükün ilik me ruungeröü ruopükü.

²²Nge chon ewe ainangen Peniamin repwe nom ünükür. Iten nöür souemwen Apitan nöün Kiteoni mwän.

²³Iteiten ekewe mwän lon än Apitan mwich ükükün ilik me limungeröü föpükü.

²⁴Iwe, iteiten chokewe meinisin mi imweimw lon kinikinin Efraim lon tettelin ar kewe mwich ükükün ipükü walungeröü ipükü mwän. Ir repwe nom lon tettel nampa ülüngat lupwen fansoun ar sai.

²⁵Iwe, peliefengin ewe imwenfel seni mangaku chon ewe ainangen Tan me ekewe mwich mi chu ngeni lon an kinikin repwe aüetä imwer imw mangaku fän ar filäik lon tettelin en me an mwich. Iten souemwenin ewe ainangen Tan Ahieser nöün Amisatai mwän.

²⁶Iteiten ekewe mwän lon än Ahieser mwich ükükün wone me ruungeröü füpükü.

²⁷Iwe, chon ewe ainangen Aser repwe aüetä imwer ünükür. Iten nöür souemwen Pakiel nöün Okran mwän.

²⁸Iteiten ekewe mwän lon än Pakiel mwich ükükün faik me eungeröü limepükü.

²⁹Nge chon ewe ainangen Naftali repwe nom ünükür. Iten nöür souemwen Ahira nöün Enan mwän.

³⁰Iteiten ekewe mwän lon än Ahira mwich ükükün lime me ülüngatngeröü föpükü.

³¹Iwe, iteiten chokewe meinisin mi imweimw lon kinikinin Tan ükükün ipükü lime me fisungeröü wonopükü mwän. Iwe, repwe nom mwirichikin lupwen fansoun ar sai fän en me an filäik.”

³²Iwe, ikkei ir ekewe aramasen Israel ra alealong lon en me än saman cho. Nge kapachelapen meinisin mi alea lon tettelin ar kewe mwich lon lenier kewe ükükün wonopükü ülüngatngeröü limepükü lime mwän.