Numperis 26:7-36

⁷Iteiter meinisin me lon ewe ainangen Rupen faik me ülüngatngeröü füpükü ilik mwän.

⁸Iwe, nöün Palu mwän: Eliap.

⁹Nge nöün Eliap kewe mwän: Nemuel, Tatan me Apiram. Ätekei Tatan me Apiram ra kefilitä seni ewe mwichen aramas pwe nöür nöüwis. Ra ü ngeni Moses me Aaron o eti än Kora mwich le ü ngeni ewe Samol mi Lapalap.

¹⁰Mürin, ewe pwül a sangfesen o oromirela fiti Kora. Iei usun ekewe aramas ra mäla, nge ekkei a kenala ekewe ruopükü lime mwän. Iwe, a fis pwe ir eu lenien eniweniw.

¹¹Nge nöün Kora kewe mwän resap mäla.

¹²Iwe, ekewe mwirimwirin Simeon lon tettelin ar kewe cho: än Nemuel cho, än Jamin cho, än Jakin cho,

¹³än Sera cho me än Shaul cho.

¹⁴Iteiter meinisin me lon ewe ainangen Simeon rüe me ruungeröü ruopükü mwän.

¹⁵Iwe, ekewe mwirimwirin Kat lon tettelin ar kewe cho: än Sefon cho, än Haki cho, än Shuni cho,

¹⁶än Osni cho, än Eri cho,

¹⁷än Arot cho me än Areli cho.

¹⁸Iteiter meinisin me lon ewe ainangen Kat faik ngeröü limepükü mwän.

¹⁹Iwe, nöün Juta kewe mwän Er me Onan. Nge Er me Onan ra mäla lon ewe fanü Kanaan.

²⁰Iwe, ekewe mwirimwirin Juta lon tettelin ar kewe cho: än Shela cho, än Peres cho me än Sera cho.

²¹Nge ekewe mwirimwirin Peres: än Hesron cho me än Hamul cho.

²²Iteiter meinisin me lon ewe ainangen Juta fik me wonungeröü limepükü mwän.

²³Iwe, ekewe mwirimwirin Isakar lon tettelin ar kewe cho: än Tola cho, än Puwa cho,

²⁴än Jasup cho me än Simron cho.

²⁵Iteiter meinisin me lon ewe ainangen Isakar wone me rüanüngeröü ülüpükü mwän.

²⁶Iwe, ekewe mwirimwirin Sepulon lon tettelin ar kewe cho: än Seret cho, än Elon cho me än Jalel cho.

²⁷Iteiter meinisin me lon ewe ainangen Sepulon wone ngeröü limepükü mwän.

²⁸Iei ekewe mwirimwirin Josef lon tettelin ar kewe cho mi pop seni Manasa me Efraim:

²⁹Ekewe mwirimwirin Manasa: än Makir cho me än Kiliat cho. (Iwe, Makir semen Kiliat.)

³⁰Nge ekewe mwirimwirin Kiliat: än Jeser cho, än Helek cho,

³¹än Asriel cho, än Sekem cho,

³²än Semita cho me än Hefer cho.

³³Nge Selofehat nöün Hefer we mwän esap wor nöün mwän, pwe a chök wor nöün fefin. Iwe, ikkei iten nöün Selofehat kewe fefin: Mala, Noa, Hokla, Milka me Tirsa.

³⁴Iteiter meinisin me lon ewe ainangen Manasa lime me ruungeröü füpükü mwän.

³⁵Iwe, ekewe mwirimwirin Efraim lon tettelin ar kewe cho: än Sutela cho, än Peker cho me än Tahan cho.

³⁶Nge ekewe mwirimwirin Sutela: än Eran cho.