Numperis 24:5-20

⁵A fokun mürina imwemi kewe imw mangaku me leniemi kewe ämi chon Israel.

⁶Ra usun chök tettelin ekewe irä palm mi langatam telin, pwal usun chök ekewe tanipi ünükün eu chanpupu. Iwe, ra usun chök irä mi pwokus itan aloes, ewe Samol mi Lapalap a fotuki, pwal usun chök ekewe irä setar ünükün ekewe chanpupu.

⁷Iwe, koluk epwe pupu seni ar lenien koluk, repwe fotuki fotar pwükil lon pwülüchöchön. Ar king epwe tekia seni ewe king Akak, nge mwür epwe fefeitä.

⁸Kot a emwenirewu seni Isip, ar pöchökül a usun chök pöchökülen eman ätemwänin kow mi mwacho. Iwe, repwe asomwala ekewe mwü mi ü ngeniir, repwe kupi chüür o atatakisiir, repwe pwal posu ngeniir wokur kewe esefich.

⁹Ewe mwün Israel a wewe ngeni eman laion mi pwora. Lupwen a konola, esap wor eman a tongeni apwätäi. Ra feiöch chon afeiöchü chon Israel, nge ra anümamau chon anümamaueer.

¹⁰Mürin, Palak a fokun song ngeni Palam, a öüwu pöün o üreni, “Üa körukoto pwe kopwe anümamaua chokewe üa oputeer. Nge iei ka fen afeiöchüür fän ülüngat.

¹¹Iei mine kopwe süla lon fanüom. Üa pwon ngonuk pwe üpwe liwiniik, nge ewe Samol mi Lapalap a amwöchü senuk liwinum.”

¹²Nge Palam a üreni Palak, “Üa fen üreni noum kewe chon künö ka tinireto rei,

¹³pwe inamwo ika kopwe ngeniei om silifer me kolt meinisin mi nom lon imwom, üsap tongeni lükümach ngeni än ewe Samol mi Lapalap kapas, pwe üpwe föri letipei. Ikamwo a öch ika a ngau, üpwe chök apasa mine ewe Samol mi Lapalap a kapas ngeniei.

¹⁴Iei üpwe liwinla ren aramasei kewe. Nge üpwe asile ngonuk mine ekewe aramasen Israel repwe föri ngeni noum aramas lon ekan rän mwach.”

¹⁵Mürin, Palam a popuetä an kapasen osuni o üra, “Iei alon Palam nöün Peor we mwän. Iei alon ewe mwän mi fat mesan,

¹⁶alon ätewe mi rongorong än Kot kapas o angei ewe tipachem seni Ewe mi Unusen Tekia, ätewe mi wor künan seni Ewe mi Unusen Manaman. A chapetiu, nge mesan esap pwölüpwöl:

¹⁷Üa küna i, nge esap iei, üa nenengeni, nge esap kanoto. Eföü fü epwe tötä seni Israel, eman king epwe ütä seni lon Israel pwe epwe nemenem. Epwe amökü möküren ekewe chon Moap o niela ekewe mwirimwirin Set meinisin.

¹⁸Epwe akufu chokewe mi oput i me lon Etom o fanüeni fanüer. Nge Israel epwe chök win.

¹⁹Eman sounemenem epwe towu seni ekewe mwirimwirin Jakop, epwe arosala chokewe mi chüen manau meinisin.”

²⁰Mürin Palam a nenela won Amalek o eäni an kapasen osuni usun, “Amalek, ewe mwü mi akom me lein ekewe mwü meinisin, nge sopolan epwe unusen tala.”