Numperis 23:12-23

¹²Iwe, Palam a üra, “Ifa usun, üpwe tongeni apasa och me lükün mine ewe Samol mi Lapalap a aiti ngeniei?”

¹³Mürin, Palak a üreni Palam, “Kopwe etieila lon pwal eu leni ia ka tongeni küna ekewe aramas me ie. Pun kopwe chök küna eu kinikin seni ar we mwich, nge sap unuser. Iwe, kopwe anümamaueer ngeniei seni ikenan.”

¹⁴Iwe, a emwenala Palam ngeni ewe lemälen Sofim won ungen ewe chuk Piska. Ikenan a pwal senätä fisu rongen asor o eäni asor eman ätemwänin kow me eman ätemwänin sip won eu me eu kewe rongen asor.

¹⁵Nge Palam a üreni Palak, “Kopwe ütä ikei lükün om kei asoren kek, nge ngang üpwe churi ewe Samol mi Lapalap ikenan.”

¹⁶Iwe, ewe Samol mi Lapalap a churi Palam o aiti ngeni mine epwe apasa. Mürin a üreni, “Kopwe liwinla ren Palak, nge epwe ina chök alom ngeni.”

¹⁷Iwe, Palam a liwinla ren Palak o küna pwe a chüen ütä lükün an kewe asoren kek, nge ekewe souakomwen Moap ra nom ren. Iwe, Palak a aisini, “Met ewe Samol mi Lapalap a apasa?”

¹⁸Mürin, Palam a popuetä an kapasen osuni o üra, “Kopwe ütä, Palak, o rongorong. Kopwe aüselingaei, en nöün Sipor we mwän.

¹⁹Kot esap eman aramas pwe epwe chofana, esap pwal i nöün aramas pwe epwe ekieksefäl. Ifa usun, epwe apasa och, nge esap föri? Ika epwe pwonei och, nge esap apwönüetä?

²⁰Ngang üa angei eu allük pwe üpwe afeiöchü chon Israel. Kot a afeiöchüür, nge üsap tongeni sorei.

²¹Üsap küna pwe epwe wor feiengau ika osukosuk ngeni ekewe chon Israel lon ekewe fansoun repwe feito. Ewe Samol mi Lapalap ar Kot a nom rer, ra pwärätä fän mweireir pwe i ar king.

²²Kot a emwenirewu seni Isip, ar pöchökül a usun chök pöchökülen eman ätemwänin kow mi mwacho.

²³Pun esap wor och pöüt ika och rong epwe küw ekewe chon Israel o afeiengaueer. Lon ei fansoun repwe apasa usun ekewe aramasen Israel, ‘Nengeni mine Kot a föri fän iter.’