Numperis 22:4-23

⁴Iwe, ekewe chon Moap ra kapas ngeni ekewe souakomwen Mitian, “Ei mwichemongun aramas epwe asomwa meinisin mine a nom ünüküch, usun eman ätemwänin kow a asomwa fetilin lemäl.” Nge Palak nöün Sipor mwän a kingen Moap lon ewe fansoun.

⁵Iwe, a tinala chon künö ren Palam nöün Peor mwän lon Petor, a arap ngeni ewe chanpupu Oifrat lon ewe fanü Amaw. Iwe, ra uwei ngeni alon Palak o üreni, “Eu mwichen aramas a feito seni Isip, a pwölüela unusen ewe fanü o nonom kükü ngeniei.

⁶Kose mochen kopwe feito iei o anümamaua ngeniei ekei aramas, pun ir ra kon pöchökül seniei. Eli üpwe tongeni akufuur o asürela seni ewe fanü. Pun üa silei pwe iö en ka afeiöchü a feiöch, nge iö ka anümamaua a anümamau.”

⁷Iwe, ekewe souakomwen Moap me ekewe souakomwen Mitian ra feila ren Palam o uweela owun eman soupwe. Nge lupwen ra tori, ra apworausa ngeni alon Palak.

⁸Iwe, Palam a üreniir, “Oupwe pwinii epwin ikei pwe üpwe aiti ngenikemi usun mine ewe Samol mi Lapalap a aiti ngeniei.” Iei usun ekewe souakom seni Moap ra nom ren Palam.

⁹Iwe, Kot a feito ren Palam o aisini, “Iö ekewe mwän ra nom reöm?”

¹⁰Nge Palam a üreni Kot, “Palak ewe kingen Moap a tinireto rei pwe repwe üreniei,

¹¹pwe eu mwichen aramas a feito seni Isip o pwölüela unusen ewe fanü. A titi ngang pwe üpwe anümamaueer ngeni, pwe epwe tongeni maun ngeniir o asürela.”

¹²Nge Kot a üreni Palam, “Kosap etiirela. Kosap anümamaua ekewe aramas, pun ir ra feiöch.”

¹³Iwe, Palam a pwätä lesosor o üreni nöün Palak kewe chon künö, “Oupwe liwinla lon fanüemi, pun ewe Samol mi Lapalap esap mwüt ngeniei pwe üpwe etikemi.”

¹⁴Iei mine ekewe chon künö ra ütä o liwinla ren Palak. Iwe, ra üreni, “Palam esap mochen etikem.”

¹⁵Mürin, Palak a pwal tinisefäliela eu mwichen souakom mi chocho o iteföüla seni ätekewe.

¹⁶Iwe, ra feito ren Palam o üreni alon Palak, “Kosap mwüt ngeni och epwe epetuk seni om kopwe feito rei.

¹⁷Pun üpwe ngonuk chomong liwinum, nge meinisin mine ka üreniei üpwe föri. Kose mochen kopwe chök feito o anümamaua ngeniei ekei aramas.”

¹⁸Nge Palam a pälüeni nöün Palak kewe chon künö, “Are Palak epwe fen ngeniei an silifer me kolt meinisin mi nom lon imwan, üsap tongeni föri och mi watte ika kis pwe üpwe tongeni lukumach ngeni ewe allük än ewe Samol mi Lapalap ai we Kot.

¹⁹Nge iei üa tüngor ngenikemi pwe oupwe pwal pwinii epwin ikei, pwe üpwe silei ika ewe Samol mi Lapalap epwe pwal üreniei och.”

²⁰Iwe, Kot a feito ren Palam lon ewe pwinin o üreni, “Are ekei mwän ra feito pwe repwe köruk, kopwe etiir. Nge kopwe chök föri mine ngang üpwe ürenuk.”

²¹Iwe, Palam a pwätä lesosor, a rietä ewe lenien mot won nöün aas, a tötä won o eti ekewe souakomwen Moap.

²²Nge Kot a fokun song pokiten an feila. Iwe, Palam a sai won nöün we aas, nge ruoman nöün chon angang ra eti. Iwe, nöün ewe Samol mi Lapalap chon läng a ütä lon ewe al pwe epwe pinei an sai.

²³Iwe, ewe aas a küna nöün ewe Samol mi Lapalap we chon läng a ütä lon ewe al o amwöchü efoch ketilas lepöün. Iwe, ewe aas a müttir rikiwu seni ewe al o feilong lemäl. Nge Palam a wichi ewe aas pwe epwe liwiniti ewe al.