Numperis 21:1-24

¹Nge lupwen ewe kingen Arat ewe re Kanaan mi nonom lon ewe fanü Nekep a rongorong pwe chon Israel ra feito won ewe al ngeni Atarim, a maun ngeni chon Israel o liapeni ekoch leir.

²Mürin, chon Israel ra föri eu pwon ngeni ewe Samol mi Lapalap o üra, “Are kopwe fangelong ekei aramas fän nemenemem, äm aipwe wesewesen aroserela o ataela ar kewe telinimw.”

³Iwe, ewe Samol mi Lapalap a rongorong än chon Israel kapas o atolonga ekewe chon Kanaan fän nemeniir. Iwe, ra wesewesen aroserela o ataela ar kewe telinimw. Iei mine ra aita ngeni ewe leni Horma .

⁴Iwe, ekewe chon Israel ra feila seni ewe chuk Hor o sai won ewe al mi ale ngeni ewe Setipar, pwe repwe pwelila lükün ewe fanü Etom. Iwe, ekewe aramas resap chüen engila fän weiresin ar sai

⁵o eäni kapasen ü ngeni Kot me Moses. Ra apasa, “Pwota ka emwenikeemiwu seni Isip pwe aipwe mäla lon ewe fanüapö? Pun esap wor mongö ikei, esap pwal wor koluk, nge äm aia noow ei mongö esap ngünü.”

⁶Mürin, ewe Samol mi Lapalap a tinato serepenit mi poison lein ekewe aramas. Iwe, ra küw chomong aramasen Israel, pwe ra mäla.

⁷Iwe, ekewe aramas ra feito ren Moses o üreni, “Äm aia tipis, pun aia eäni kapasen ü ngenikemi me ewe Samol mi Lapalap. Kopwe tüngor ngeni ewe Samol mi Lapalap pwe epwe angei senikem ekewe serepenit.” Iei mine Moses a iotek fän iten ekewe aramas.

⁸Mürin, ewe Samol mi Lapalap a üreni Moses, “Kopwe föri uluulun eman serepenit seni piras o eitiuätä won efoch mwüüch. Nge lupwen ekewe serepenit ra küw eman, epwe manau are i epwe nenengeni ewe uluulun serepenit.”

⁹Iei mine Moses a föri uluulun eman serepenit seni piras o eitiuätä won efoch mwüüch. Iwe, are eman serepenit a küw eman aramas, nge a nenengeni ewe uluulun serepenit seni piras, a manau.

¹⁰Iwe, ekewe aramasen Israel ra sopwela ar sai tori Opot o aüetä imwer ie.

¹¹Mürin ra sai seni Opot tori Ieaparim lon ewe fanüapö ötiuen ewe fanü Moap. Ikenan ra aüetä imwer.

¹²Iwe, ra pwal sai seni ikenan o sai ngeni ewe lemolun Seret o aüetä imwer ie.

¹³Mürin ra pwal sai seni ikenan o aüetä imwer lon ewe fanüapö efengin ewe chanpupu Arnon chöülan ewe fanüen chon Amor. Pun ewe chanpupu Arnon kiän lefilen Moap me chon Amor.

¹⁴Iei mine a mak lon ewe puken maun än ewe Samol mi Lapalap, “Wahep lon Sufa me ekewe lemol, ewe chanpupu Arnon

¹⁵me pwokuren ekewe lemol mi chöütiu tori ewe telinimw Ar pwal tori kiännin Moap.”

¹⁶Iwe, seni ikenan ra sai tori Peer. Iei ewe chönüttu ia ewe Samol mi Lapalap a kapas ngeni Moses me ie, “Kopwe emwichafengeni ekewe aramas pwe ngang üpwe ngeniir koluk.”

¹⁷Iwe, lon ewe fansoun ekewe chon Israel ra kölü ei köl: “Kopwe michitä en chönüttu. Sipwe köl ngeni.

¹⁸Iei ewe chönüttu ekewe samol ra tuw, pwal ekewe mi iteföüla. Ra tuw ngeni ewe wokun samol, pwal ngeni wokur.” Iwe, seni ewe fanüapö ra saila ngeni Matana.

¹⁹Iwe, ra sai seni Matana tori Nahaliel, nge seni Nahaliel tori Pamot.

²⁰Mürin ra sai seni Pamot tori ewe lemol mi nom lon kinikinin Moap fäsonun ungen ewe chuk Piska mi sasapetiu won ewe fanüapö.

²¹Mürin, ekewe chon Israel ra tinala chon künö ren Sihon ewe kingen Amor pwe repwe üreni,

²²“Kose mochen kopwe mwüt ngenikem pwe aipwe pwerelong lon fanüom. Äm aisap kul ngeni om tanipin wiich ika tanipin wain, aisap pwal ün koluk seni ekewe chönüttu. Äm aipwe chök fetal won än ewe king alelap tori aipwe pwerewu seni fanüom.”

²³Nge Sihon esap mochen mwüt ngeni ekewe chon Israel pwe repwe pwerelong lon fanüan. Iwe, a emwichafengeni nöün kewe sounfiu meinisin o feila lon ewe fanüapö pwe epwe maun ngeni chon Israel. Iwe, lupwen a tori Jahas, a maun ngeniir.

²⁴Nge ekewe chon Israel ra niela Sihon me chomong nöün sounfiu o liapeni fanüan seni ewe chanpupu Arnon tori ewe chanpupu Japok. Nge ra chök tori kiännin fanüen chon Amon, pun a pöchökül tittin kiännin.