Numperis 20:3-14

³Iwe, ekewe aramas ra anini ngeni Moses o üreni, “Amwo aia eti pwim kewe ra mäla fän mesen ewe Samol mi Lapalap.

⁴Pwota oua emwenato nöün ewe Samol mi Lapalap mwichen aramas lon ei fanüapö pwe aipwe mäla ikei, äm me nöüm kewe man?

⁵Pwota oua emwenikeemiwu seni Isip o emwenikeemilong lon ei leni mi ngau. Ei leni esap eu lenien fot föün wiich, esap pwal mär irä fiik me irän wain me apel won. Iwe, esap pwal wor ünümem koluk ikei.”

⁶Mürin, Moses me Aaron ra feila seni ekewe aramas, ra feila ren asamalapen ewe imwenfel seni mangaku o chapetiu lepwül. Iwe, lingen ewe Samol mi Lapalap a pwä ngeniir,

⁷nge ewe Samol mi Lapalap a üreni Moses,

⁸“Kopwe angei ewe wok mi nom ren ewe pworofel o emwichato ekewe aramas meinisin, ämi me Aaron pwiüm we. Oupwe fos me fän meser ngeni ewe achau pwe epwe atowu kolukun lon. Iei usun kopwe atowu koluk seni lon ewe achau fän iter, pwe kopwe aünü ekewe aramas me nöür man.”

⁹Iwe, Moses a angei ewe wok usun ewe Samol mi Lapalap a allük ngeni.

¹⁰Iwe, Moses me Aaron ra emwichafengeni ekewe aramas meinisin mwen ewe achau. Iwe, Moses a üreniir, “Oupwe rongorong, ämi chon ü ngeniei. Ifa usun, äm aipwe atowu koluk seni lon ei achau fän itemi?”

¹¹Mürin, Moses a aitiela wokun o wichi ewe achau fän ruu. Iwe, ewe koluk a pumongowu, pwe ekewe aramas me nöür kewe man ra ün.

¹²Nge ewe Samol mi Lapalap a üreni Moses me Aaron, “Pokiten ousap lüküei, ousap pwal apiniöchüei me fän mesen ekewe aramasen Israel, iei mine ousap emwenirelong lon ewe fanü üpwe ngeniir.”

¹³Ei a fis me arun ewe kolukun Meripa , ewe ia ekewe aramasen Israel ra anini ngeni ewe Samol mi Lapalap ie, nge i a pwärätä me leir pwe a pin.

¹⁴Iwe, Moses a tinala chon künö seni lon Kates ren ewe kingen Etom pwe repwe üreni, “Iei alon pwiüm kewe chon Israel: En ka püsin silei usun ewe riaföü a torikem.