Numperis 18:18-31

¹⁸Nge fituker ochom, usun chök ewe leup seni ewe asor mi assaw me ewe pelifichin pechen pwal ochom.

¹⁹Iwe, ekewe asor mi pin meinisin ekewe aramasen Israel ra asor ngeniei ngang üa ngenikemi me noum kewe mwän me fefin pwe inetimi tori feilfeilachök. Iei eu pwon esap tongeni tala tori feilfeilachök, üa föri ngenikemi me mwirimwirum kana.”

²⁰Iwe, ewe Samol mi Lapalap a pwal üreni Aaron, “Kosap fanüeni eu fanü me lon Israel, esap pwal wor inetum me leir. Pun ngang inetum me wisom me lein ekewe aramasen Israel.

²¹Iwe, üa ngeni chon ewe ainangen Lefi än chon Israel leengol meinisin ra uwato rei, pwe wiser fän iten ar angang lon ewe imwenfel seni mangaku.

²²Ekewe aramasen Israel resap chüen kanoto ren ewe imwenfel seni mangaku, pwe resap tipis o mäla.

²³Nge chon ewe ainangen Lefi repwe föri angangen ewe imwenfel seni mangaku o wisen tümwünü seni sokun limengau. Ei epwe eu allük tori feilfeilachök seni eu täppin aramas tori eu täppin. Iwe, esap pwal wor wisen chon ewe ainangen Lefi fanü me lein ekewe aramasen Israel.

²⁴Pun än ekewe aramasen Israel leengol ra eäni asor ngeniei üa ngeni chon ewe ainangen Lefi pwe wiser. Iei popun üa üreniir pwe esap wor wiser fanü me lein ekewe aramasen Israel.”

²⁵Iwe, ewe Samol mi Lapalap a kapas ngeni Moses,

²⁶“Kopwe pwal üreni chon ewe ainangen Lefi: Lupwen oupwe angei seni ekewe aramasen Israel ewe leengol ewe Samol mi Lapalap a ngenikemi pwe wisemi, ämi oupwe pwal eäni asor ngeni ewe Samol mi Lapalap eu leengol seni ewe leengol oua angei.

²⁷Ren ämi eäni ekewe asoren leengol, oua usun chök chon Israel mi eäni asor eu leengol seni ar föün wiich me ar wain.

²⁸Iei usun pwal ämi oupwe eäni asor ngeni ewe Samol mi Lapalap seni ämi leengol meinisin oua angei seni ekewe aramasen Israel. Iwe, oupwe ngeni ewe souasor Aaron mine än ewe Samol mi Lapalap.

²⁹Iwe, seni ekewe lifang meinisin oua angei, oupwe eäni asor ngeni ewe Samol mi Lapalap ewe kinikin mi fokun mürina o pin.

³⁰Iwe, kopwe pwal üreni chon ewe ainangen Lefi: Lupwen oua wes le eäni asor mine a fokun mürina, ewe lusun epwe usun chök ekewe föün wiich seni püsin ämi lenien wichiwich umwun wiich, pwal usun chök ewe wain seni ämi lenien üchüch föün irän wain ngenikemi.

³¹Iwe, ewe lusun oupwe tongeni mongö ekis meinisin, ämi me chon leimwemi. Pun iei liwinimi fän iten ämi angang lon ewe imwenfel seni mangaku.