Numperis 16:3-29

³Iwe, ra mwichfengen o ü ngeni Moses me Aaron. Iwe, ra üreniir, “Ämi oua kon alapala nemeniemi. Pun unusen ei mwichen aramas a pin, nge ewe Samol mi Lapalap a nom lefiler. Pwota oua püsin atekiakemiitä won än ewe Samol mi Lapalap mwich?”

⁴Iwe, lupwen Moses a rong ekei kapas, a chapetiu lepwül o iotek.

⁵Mürin a üreni Kora me chienan kewe meinisin, “Lesosorun lesor ewe Samol mi Lapalap epwe pwärätä iön nöün pwal iön a pin. Epwe pwal pwärätä iön a mwüt ngeni pwe epwe kan ngeni. Ätewe Kot a filätä epwe kan ngeni.

⁶Iei usun oupwe föri: Lesor, ämi Kora me chienom kewe meinisin oupwe angei sepien asoren ötüöt.

⁷Oupwe uwalong ekkei lor o iseis apach mi pwokus wor fän mesen ewe Samol mi Lapalap. Nge ätewe ewe Samol mi Lapalap epwe filätä, i epwe pin. Ämi kana mwän seni ewe ainangen Lefi oua kon alapala nemeniemi.”

⁸Iwe, Moses a pwal üreni Kora, “Iei oupwe aüseling, ämi chon ewe ainangen Lefi.

⁹Ifa usun, esap naf ngenikemi pwe än chon Israel we Kot a aimwükemi seni ewe mwichen chon Israel, a pwal mwüt ngenikemi pwe oupwe kan ngeni o föri angangen lon än ewe Samol mi Lapalap imwenfel seni mangaku? Oua pwal ü mwen ewe mwichen aramas pwe oupwe angang ngeniir.

¹⁰Kot a mwüt ngenikemi me pwimi kewe seni ewe ainangen Lefi pwe oupwe kan ngeni. Nge iei oua pwal kütta ewe wisen souasor.

¹¹Iei mine oua ü ngeni ewe Samol mi Lapalap, ämi me chienom kewe mi mwichefengen. Pun iö Aaron pwe oua lal ngeni?”

¹²Mürin, Moses a titi Tatan me Apiram nöün Eliap kewe mwän. Nge ir ra üra, “Äm aisap feila.

¹³Ifa usun, esap naf me reöm pwe ka emwenikeemiwu seni ewe fanü mi pwülüöch o fanüeräs, pwe kopwe nikem lon ewe fanüapö? Ifa usun, kopwe pwal seikuketä pwe kopwe samol wom?

¹⁴Kosap fokun emwenikeemilong lon eu fanü mi pwülüöch o fanüeräs, kosap pwal ngenikem fanü me tanipin wain pwe aipwe fanüeni. Ifa usun, kopwe pwal atupu ekei aramas? Äm aisap feila.”

¹⁵Mürin, Moses a fokun song ren ekei kapas o üreni ewe Samol mi Lapalap, “Kosap etiwa ar kewe asor. Ngang üsap mwo nge angei eman aas seniir, üsap pwal föri och mi mwäl ngeniir.”

¹⁶Iwe, Moses a üreni Kora, “Ämi me chienom kewe meinisin, oupwe feito lesor ren ewe imw mangaku ia aramas ra churi Kot ie, ämi pwal Aaron.

¹⁷Iwe, eman me eman leimi epwe angei an sepien asoren ötüöt, epwe iseis apach mi pwokus lon o uwato fän mesen ewe Samol mi Lapalap. Iwe, epwe wor ruopükü lime sepien asoren ötüöt, pwal en me Aaron oupwe uwato ämi sepien asoren ötüöt.”

¹⁸Iei mine ekewe mwän meinisin ra angei ar sepien asoren ötüöt, ra uwalong ekkei lor o iseis apach mi pwokus wor. Iwe, ra ütä leasamalapen ewe imwenfel seni mangaku, nge Moses me Aaron ra pwal ütä rer.

¹⁹Mürin, Kora a amwichafengeni ekewe aramas meinisin leasamalapen ewe imwenfel seni mangaku, pwe repwe ü ngeni Moses me Aaron. Iwe, lingen ewe Samol mi Lapalap a pwä ngeni ewe mwichen aramas meinisin.

²⁰Iwe, ewe Samol mi Lapalap a üreni Moses me Aaron,

²¹“Oupwe aimwükemi seni ekei aramas pwe üpwe aroserela fän eu chök.”

²²Nge ir ra chapetiu lepwül o apasa, “Äm Kot, en popun manauen aramas meinisin. Ifa usun, kopwe song ngeni unusen ewe mwichen aramas are eman chök mwän a tipis?”

²³Mürin, ewe Samol mi Lapalap a kapas ngeni Moses,

²⁴“Kopwe üreni ekewe aramas pwe repwe sü seni imwen Kora, Tatan me Apiram.”

²⁵Mürin, Moses a feila ren Tatan me Apiram, nge ekewe souakomwen Israel ra tapwela mürin.

²⁶Iwe, a üreni ekewe aramas, “Üa tüngor ngenikemi, oupwe feil seni imwen ekei mwän mi föföringau. Ousap atapa och pisekir, pwe ousap pwal etiir le tolong lon ewe feiengau epwe toriir pokiten ar kewe tipis.”

²⁷Iei mine ekewe aramas ra sü seni imwen Kora, Tatan me Apiram. Nge Tatan me Apiram ra towu o ütä leasamalapen imwer kewe fiti pwülüer me nöür mwän pwal nöür semirit.

²⁸Iwe, Moses a üra, “Ren ei oupwe silei pwe ewe Samol mi Lapalap a akünöüei pwe üpwe föri ekei föför meinisin, nge üsap püsin ekiekietä.

²⁹Are ekei mwän ra mäla lon sokun mälan armamas, ika a fis ngeniir mine a fis ngeni aramas meinisin, ewe Samol mi Lapalap esap akünöüei.