Numperis 16:26-33

²⁶Iwe, a üreni ekewe aramas, “Üa tüngor ngenikemi, oupwe feil seni imwen ekei mwän mi föföringau. Ousap atapa och pisekir, pwe ousap pwal etiir le tolong lon ewe feiengau epwe toriir pokiten ar kewe tipis.”

²⁷Iei mine ekewe aramas ra sü seni imwen Kora, Tatan me Apiram. Nge Tatan me Apiram ra towu o ütä leasamalapen imwer kewe fiti pwülüer me nöür mwän pwal nöür semirit.

²⁸Iwe, Moses a üra, “Ren ei oupwe silei pwe ewe Samol mi Lapalap a akünöüei pwe üpwe föri ekei föför meinisin, nge üsap püsin ekiekietä.

²⁹Are ekei mwän ra mäla lon sokun mälan armamas, ika a fis ngeniir mine a fis ngeni aramas meinisin, ewe Samol mi Lapalap esap akünöüei.

³⁰Nge are ewe Samol mi Lapalap epwe afisätä och mettoch mi fö, are ewe pwül epwe sangfesen o oromirela fiti pisekir meinisin pwe ra feilmanauetiu lon lenien sotup, oupwe silei pwe ekei mwän ra turunufasei ewe Samol mi Lapalap.”

³¹Iwe, wesin chök än Moses üra ekei kapas, ewe pwül fän Tatan me Apiram a sangfesen

³²o oromirela fiti ar famili meinisin, pwal chienen Kora kewe mwän meinisin me pisekir meinisin.

³³Iei usun ir meinisin ra feilmanauetiu lon lenien sotup fiti pisekir meinisin. Iwe, ewe pwül a pwölürela pwe ra mola seni me lein ewe mwichen aramas.