Numperis 15:22-41

²²Ewe Samol mi Lapalap a ngenikemi ekei allük meinisin Moses a aiti ngenikemi. Are oua atai eu lein ekei allük, nge sap ren mochenin letipemi,

²³ika mwirimwirimi kana ra pwal atai,

²⁴nge ewe mwichen aramas esap mefi pwe a mwäl, ikei mine oupwe föri: Unusen ewe mwichen aramas epwe eäni asor eman nienifön ätemwänin kow fän iten asoren kek ewe Samol mi Lapalap a efich pwoon. Repwe achu ngeni ewe asoren mongö me asoren ün usun mine a pwüng. Repwe pwal eäni asor eman ätemwänin kuuch fän iten asoren tipis.

²⁵Iwe, ewe souasor epwe föri asoren amusamusen tipis fän iten unusen ewe mwichen chon Israel. Ar föför mi mwäl epwe musala, pun esap fis seni mochenin letiper, ra pwal uwato ar asoren kek ewe Samol mi Lapalap a efich pwoon, me ar asoren tipis.

²⁶Iwe, unusen ewe mwichen chon Israel me ekewe chon ekis mi nom leir epwe musala ar mwäl, pun iteiter meinisin ra pachelong lon ewe föför mi mwäl esap fis ren mochenin letiper.

²⁷Iwe, are eman aramas a tipisin chechengau, epwe eäni asor eman liefefinin kuuch eu ierin fän iten asoren tipis.

²⁸Iwe, ewe souasor epwe föri asoren amusamusen tipis fän mesen ewe Samol mi Lapalap fän iten ewe aramas mi föri och mwäl, lupwen a tipisin chechengau. Iwe, epwe musala an tipis.

²⁹Iwe, epwe wor eu chök allük fän iten ätewe mi tipisin chechengau, ese lifilifil ika i eman lein ekewe aramasen Israel ika eman chon ekis mi nom leir.

³⁰Nge are eman a tipis seni mochenin letipan, ese lifilifil ika i eman chon wilipos ika eman chon ekis, ätewe a turunufasei ewe Samol mi Lapalap. Ewe aramas epwe käriwu seni me lein aramasan.

³¹Pokiten ewe aramas a oput än ewe Samol mi Lapalap kapas o purätiu an allük, epwe wesewesen käriwu. An tipis epwe chök nonom won.”

³²Iwe, lupwen ekewe aramasen Israel ra nom lon ewe fanüapö, ra küna eman mwän a os mwüüch lon ewe ränin sapat.

³³Nge chokewe mi küna ätewe mi os mwüüch, ra emwenato ren Moses me Aaron pwal ren ekewe aramas meinisin.

³⁴Iwe, ra kalapusei ewe mwän, pun esap fat mine epwe fis ngeni.

³⁵Mürin, ewe Samol mi Lapalap a üreni Moses, “Ewe mwän epwe ninnila. Ekewe aramas meinisin repwe monei ngeni fau me lükün ewe ia oua nonom ie.”

³⁶Iei mine ekewe aramas meinisin ra emwenala ewe mwän lükün ewe ia ra nonom ie o monei ngeni fau tori a mäla, usun ewe Samol mi Lapalap a allük ngeni Moses.

³⁷Iwe, ewe Samol mi Lapalap a kapas ngeni Moses,

³⁸“Kopwe üreni ekewe aramasen Israel: Oupwe föri sokun fout lepwülün üfemi, ämi me mwirimwirimi kana. Oupwe pwal pacheetä won iteiten fout efoch säl mi arauarau.

³⁹Iwe, lupwen oupwe küna ewe fout, oupwe chechemeni ai kewe allük meinisin pwe oupwe aleasochisiir. Nge ousap tapwela ekiekin lelukemi me künan mesemi, usun a mecheres ngenikemi.

⁴⁰Iei usun oupwe chechemeni ai kewe allük meinisin o aleasochisiir pwe oupwe pin fän itei ngang ämi we Kot.

⁴¹Ngang ewe Samol mi Lapalap ämi we Kot, üa emwenikemiiwu seni ewe fanü Isip pwe üpwe ämi Kot: Ngang ewe Samol mi Lapalap ämi we Kot.”