Numperis 14:15-39

¹⁵Are ka nipöküela ekei aramas iei chök, chon ekewe mwü mi rongorong usun mine ka föri repwe apasa,

¹⁶‘Pokiten ewe Samol mi Lapalap esap tongeni emwenalong ekewe aramas lon ewe fanü a pwon pwe epwe ngeniir, iei mine a nirela lon ewe fanüapö.’

¹⁷Nge iei üa tüngor ngonuk, ai Samol, kopwe pwäri om manaman ngenikem usun ka fen apasa lon om pwon,

¹⁸‘Ewe Samol mi Lapalap a songomang o wöün tong, a amusala föföringau me pupungau, nge esap amusafatei chon tipis, pwe a liwini än samasam tipis won nöür tori aülüngatin me arüanün tettelin aramas.’

¹⁹Kose mochen kopwe amusala än ekei aramas tipis lon om tong mi lapalap, usun ka fen amusala än ekewe aramas tipis seni ewe fansoun ar towu seni Isip tori iei.”

²⁰Mürin, ewe Samol mi Lapalap a üreni Moses, “Üa amusala ar tipis usun ka tüngor.

²¹Nge ellet mwo manauei me ai we ling mi aura unusen fanüfan,

²²esap wor eman lein ekewe mwän repwe tolong lon ewe fanü. Ra küna ai ling me ai kewe manaman üa föriir lon Isip pwal lon ewe fanüapö, nge ra chök sotuniei fän chomong, resap pwal aleasochisi aloi.

²³Esap wor eman leir epwe tolong lon ewe fanü üa pwon fän akapel ngeni ar kewe lewo. Esap fokun wor eman me lein chokewe mi turunufaseei repwe tolong lon ewe fanü.

²⁴Nge nei chon angang Kalep üpwe emwenalong lon ewe fanü a fen piin feila lon, pwe mwirimwirin repwe fanüeni, pun a sokola ekiekin lelukan, a pwal fokun aleasochisiei.

²⁵Iwe, pokiten ekewe chon Amalek me chon Kanaan ra nonom lemolun ewe fanü, lesor ämi oupwe kul o feila lon ewe fanüapö won ewe al a ale ngeni ewe Setipar.”

²⁶Iwe, ewe Samol mi Lapalap a üreni Moses me Aaron,

²⁷“Ifa ükükün fansoun än ei mwichen aramasangau lal ngeniei? Üa ku ren ai rongorong än ekei aramas lal ngeniei.

²⁸Oupwe üreniir pwe iei aloi ngang ewe Samol mi Lapalap, ‘Mwo manauei, mine oua apasa, iei üpwe föri ngenikemi.

²⁹Ämi oupwe mätiu lon ei fanüapö. Nge esap wor eman me lein iteitemi seni ier rüe feitä mi lal ngeniei,

³⁰epwe tolong lon ewe fanü üa pwon fän akapel pwe oupwe fanüeni, chilon chök Kalep nöün Jefune mwän me Josua nöün Nun mwän.

³¹Nge nöümi semirit oua apasa pwe repwe oola, ngang üpwe emwenirelong lon ewe fanü ämi oua oputa, pwe repwe fanüeni.

³²Nge ämi oupwe mätiu lon ei fanüapö.

³³Iwe, nöümi repwe chon fofol man lon ewe fanüapö lon ükükün faik ier, repwe pwal riaföü pokiten ämi ousap allükülük, tori ewe amüchülan me leimi epwe mätiu lon ewe fanüapö.

³⁴Ükükün iteiten ekewe faik rän oua operi ewe fanü, iei ükükün ierin ämi oupwe uwei liwinin ämi föföringau. Pun eu ier epwe fän iten eu rän. Iei usun oupwe mefi weiresin ai ü ngenikemi lon ükükün faik ier.’

³⁵Ellet üpwe föri ei ngeni unusen ei mwich mi ngau ra chufengen lon ar ü ngeniei: Repwe mätiu o rosola lon ei fanüapö. Ngang ewe Samol mi Lapalap üa kapas.”

³⁶Nge ekewe mwän Moses a tinirela pwe repwe operi ewe fanü, ir ätekewe mi liwinto o uwato pworaus mi mwäl usun ewe fanü, pwe unusen ewe mwichen aramas ra popuetä lal ngeni Moses, ra mäla.

³⁷Pokiten ar uwato och pworaus mi mwäl usun ewe fanü, ra mäla ren och mätter fän mesen ewe Samol mi Lapalap.

³⁸Nge Josua nöün Nun mwän me Kalep nöün Jefune mwän ra manau me lein ätekewe mi feila operi ewe fanü.

³⁹Iwe, lupwen Moses a apworausa ekei kapas ngeni ekewe aramasen Israel meinisin, ra fokun lolilen.