Numperis 10:2-22

²“Kopwe föri ruofoch rappwa seni silifer mi nechenech ngeni ama. Iwe, kopwe ettikiir, lupwen kopwe körifengeni ekewe aramasen Israel, pwal lupwen repwe atomwala imwer.

³Iwe, lupwen ekewe ruofoch rappwa repwe tikitam, ekewe aramasen Israel meinisin repwe mwichefengen reöm leasamalapen ewe imw mangaku ia aramas ra churiei ie.

⁴Nge ika efoch chök a tik, ekewe souemwen, ekewe mwänirelan ekewe ainangen Israel repwe mwichefengen reöm.

⁵Iwe, lupwen oupwe ettiki ewe tikin asilesil mi tikimoch, ekewe aramas mi nonom peliötiuen ewe imwenfel seni mangaku repwe sai.

⁶Nge lupwen oupwe ettiki ewe tikin asilesil mi tikimoch fän aruuan, ekewe mi nonom peliörün repwe sai. Ewe tikin asilesil mi tikimoch epwe tik iteiten fansoun repwe sai.

⁷Iwe, lupwen ekewe aramasen Israel repwe mwichefengen, oupwe chök ettikitama ekewe rappwa, nge ousap ettiki ewe tikin asilesil mi tikimoch.

⁸Iwe, nöün Aaron kewe mwän ekewe souasor repwe ettiki ekewe rappwa. Ei epwe eu allük fochofoch ngenikemi seni eu täppin aramas tori eu täppin.

⁹Iwe, lupwen oupwe feila maun ngeni chon oputakemi mi ariaföüükemi me lon fanüemi, oupwe ettiki ewe tikin asilesilen maun ren ekewe rappwa. Mürin, ngang ewe Samol mi Lapalap ämi we Kot üpwe alisikemi o amanauakemi seni chon oputakemi.

¹⁰Oupwe ettiki ekewe rappwa pwal lon ränin ämi pwapwa, lupwen fansoun ämi kewe chulap mi kefilitä me lepoputän ekewe maram. Oupwe ettiki ekewe rappwa lupwen fansoun ämi eäni asoren kek me asoren kinamwe. Mürin üpwe alisikemi. Ngang ewe Samol mi Lapalap ämi we Kot.”

¹¹Iwe, lon aruuen ränin ewe aruuen maram lon aruuen ier mürin än chon Israel towu seni Isip, ewe kuchu a wiitä seni won ewe imwenfel seni mangaku ewe ia ekewe allük ra nom ie.

¹²Iwe, ekewe aramasen Israel ra sai seni ewe fanüapön Sinai lon tettelir. Iwe, ewe kuchu a üla lon ewe fanüapön Paran.

¹³Ekkärän iei aeuin ar sai fän än ewe Samol mi Lapalap allük ngeni Moses.

¹⁴Iwe, ekewe mwich mi nom lon kinikinin Juta ra akom le sai lon tettelir fän ar filäik. Nge Nason nöün Aminatap mwän i souemwenin chon ewe ainangen Juta.

¹⁵Iwe, Netanel nöün Suar mwän i souemwenin chon ewe ainangen Isakar.

¹⁶Nge Eliap nöün Helon mwän i souemwenin chon ewe ainangen Sepulon.

¹⁷Iwe, mürin än ewe imwenfel seni mangaku katomwola, nöün Kerson me Merari kewe mwän mi wisen mwärei ra sai.

¹⁸Mürin ekewe mwich mi nom lon kinikinin Rupen ra sai lon tettelir fän ar filaik. Nge Elisur nöün Seteur mwän i souemwenin chon ewe ainangen Rupen.

¹⁹Iwe, Selumiel nöün Surisatai mwän i souemwenin chon ewe ainangen Simeon.

²⁰Nge Eliasaf nöün Teuel mwän i souemwenin chon ewe ainangen Kat.

²¹Mürin, än Kohat cho ra sai. Ra mwärei ekewe mettoch mi pin. Nge lupwen ra tori ewe leni ia ra asösö ie, ewe imwenfel seni mangaku a fen kaütä.

²²Mürin, ekewe mwich mi nom lon kinikinin Efraim ra sai lon tettelir fän ar filaik. Nge Elisama nöün Amihut mwän i souemwenin chon ewe ainangen Efraim.