Numero 24:10-21

¹⁰Tenged dutun utew nepeuki ni Balak si Balaam. Midsumbag din is divaluy he palad din ne migkeǥiyan din si Balaam te, “Mibpesuǥuan ku sikew su wey nu merewaki is menge kuntada ku, piru nasì nu sikandan penubtuvazi te ketetelu.

¹¹Ne ǥuntaan ulì ke en! Migkaǥi a he edsuhulan ku sikew te meupiya, piru kenà edtuǥut is Nengazen he maangken nu is suhul.”

¹²Midtavak ni Balaam si Balak te, “Kenè be migkeǥiyan ku is menge menunudtulè nu,

¹³he minsan iveǥey nu pa kediey is turuǥan nu he nepenù te pelata wey vulawan, ne kena a ebpekehimu he ebaal te keugelingen ku he suat, mezaat man heini etawa meupiya. Kekenà, iyan dà egkeǥiyen ku is egkeǥiyen te Nengazen kayi te kediey.

¹⁴Guntaan, ed-ulì ad diyà te menge emurè ku te inged. Piru ebpetizeenan ku sikew he zaan ke hengkey is ebeelan kayi he menge etew ziyà te menge etew nu ziyà te huziyan he menge andew.”

¹⁵Ne migkaǥi ni Balaam heini he menge lalag: “Iyan a si Balaam he anak ni Beor, ne zuen ku meupiya he kedsavut.

¹⁶Nezineg ku is lalag te Utew Lavew he Megbevayà, ne mibeǥayen e zin te ketau. Duen mibpelewasan kedì te Mekeǥeǥehem he Megbevayà. Mibpekevavà a ziyà te etuvangan din, ne impesavut e zin. Ne iyan heini menge lalag ku:

¹⁷“Duen neehè ku ziyà te nelewasan ku he wazè pa mehitavù. Diyà te ebpekeuma he timpu, duen egkehimu he hadì te Israel he ebpuun diyà te kevuwazan ni Jacob. Ne edezeetan din is menge Moabitanhen wey is langun he kevuwazan ni Shet.

¹⁸Dutun te ebmelig-en is Israel, edsekupen din is Edom he kuntada zin, he egngezanan daan te Seir.

¹⁹Edumala is sevaha he pengulu te Israel ne edezeetan din is egkesamà he menge uuyag diyà te inged he Moab.”

²⁰Naahà ni Balaam diyà te kebpekelawas din is menge etew ni Amalek ne migkaǥi sikandin te, “Dengan iyan lavew he nasyun is Amalek, piru te huziyan he timpu egkezeetan heini.”

²¹Ne naahà daan ni Balaam diyà te kebpekelawas din is menge Kinhanen, ne migkaǥi sikandin te, “Melig-en is ubpeey niw su ziyà heini te vatu he vuvungan.