Numero 23:1-12

¹Balaaʌ̃ba Baláa jarasia: –Nama animarã babue diabadada siete odua. Maʌ̃be paca dji umaquĩrãda siete idjab̶a oveja dji umaquĩrãda siete enedua Ãcõrẽa babue diad̶i carea.–

²Ara maʌ̃da Balába osia Balaaʌ̃ba jarad̶a quĩrãca. Animarã babue diabadaza ãdji umérãba pacada ab̶a idjab̶a ovejada ab̶a Ãcõrẽa babue diasid̶aa.

³Maʌ̃be Balaaʌ̃ba jarasia: –Nama jʌ̃ãdua bʌa animarã Ãcõrẽa babue dia b̶ʌma. Mʌ̃ra awuá wãya. Mama Ãcõrẽra mʌ̃ma odjaisicada. Idjia mʌ̃́a bed̶easira bʌ́a jarad̶e zeya.– Mãwã jaraped̶a Balaaʌ̃ra eya zaque chirua neẽ́ b̶ʌd̶aa wãsia.

⁴Mama Ãcõrẽra idjimaa zesia. Balaaʌ̃ba idjía jarasia: –Mʌ̃a animarã babue diabadara siete obisia. Maʌ̃za mʌ̃a paca zaqueda ab̶a idjab̶a ovejada ab̶a bʌ́a babue diasia.–

⁵Maʌ̃ne Ãcõrẽba Balaaʌ̃a cawabisia cãrẽda jaraida b̶ʌda. Cawabiped̶a Balaaʌ̃a jarasia jẽda Balámaa jarad̶e wãmãrẽã.

⁶Ara maʌ̃da jẽda wãsia. Jũẽbʌrʌd̶e Balaaʌ̃ba unusia Balára, jũma Moab druad̶ebema dji dromarã sid̶a Ãcõrẽa animarã babue dia panʌ caita duanʌda.

⁷Maʌ̃be Balaaʌ̃ra nãwã bed̶easia: Moab druad̶ebema boro Balába mʌ̃ra Araʌ̃ druad̶eba zebisia. Ʌ̃mãdau odjabariare b̶ʌ drua eyaid̶a b̶ʌmaʌba mʌ̃ra zebisia. Idjia mʌ̃́a jarasia: “Mʌ̃ quĩrã djuburia israelerã biẽ́ jara b̶ʌd̶e zedua. Naʌ̃ Jacobod̶eba yõped̶ad̶arãra biẽ́ o b̶ʌdua.”

⁸Mãwãmĩna Ãcõrẽba bia jara b̶ʌd̶a ẽberãrãda ¿mʌ̃a sãwã biẽ́ jara b̶ʌi? Ãcõrẽba bia o b̶ʌd̶a ẽberãrãda ¿mʌ̃a sãwã biẽ́ o b̶ʌi?

⁹Naʌ̃ eya mõgaraid̶a b̶ʌd̶eba mʌ̃a israelerãra unu b̶ʌa. Naʌ̃ eya zaqued̶eba mʌ̃a ãdjirãra acʌ b̶ʌa. Jãʌ̃ purura ãdub̶a jĩga panabaria. Cawa panʌa ãdjirãra dewara puru quĩrãca panʌẽ́da.

¹⁰Jacobod̶eba yõped̶ad̶arãra ĩbʌ quĩrãca zocãrã panʌ bẽrã ni ab̶aʌba ãdjirãra poya juachad̶aẽ́a. ¿Caiba israelerãra maãrĩ poya juachai? Jãʌ̃ ẽberãrã jipa b̶ea beubʌdad̶e bid̶a bia b̶ead̶ia. Mʌ̃ beubʌrʌd̶e ara ãdji quĩrãca b̶e quĩrĩã b̶ʌa.

¹¹Balaaʌ̃ mãwã bed̶eabʌrʌ carea Balába quĩrũbid̶eba jarasia: –¿Bʌa cãrẽda jara b̶ʌ? Mʌ̃a bʌra zebisia mʌ̃ ume dji quĩrũda biẽ́ jara b̶ʌmãrẽã. Baribʌrʌ bʌa ãdjirãra bia jara b̶ʌa.–

¹²Balaaʌ̃ba panusia: –Mãwãra ¿Ãcõrẽba jarabi b̶ʌra mʌ̃a jaracara b̶ʌca?–