Numero 22:1-26

¹Midlaus medhipanew is menge Israilihanen taman te nekeuma zan diyà te suǥud te Moab. Ne migkampu zan diyà te zapit te edsilaan te Jordan, he etuvangan te Jerico.

²Ne netuenan te hadì diyà te Moab he si Balak he anak ni Zipor, is langun he mibeelan te menge Israilihanen diyà te menge Amorihanen,

³ne nahandek sikandin wey is menge Moabitanhen tenged te kahabet te menge Israilihanen.

⁴Migkaǥi is menge Moabitanhen diyà te menge perezumala ziyà te Midian te, “Ed-eminen kiw kayi te mahabet he menge etew he henduen be te vaka he ed-eminen dan edtebtava is menge sagbet.” Umbe, si Balak he anak ni Zipor, he iyan hadì diyà te Moab dutun he timpu,

⁵mibpesuǥuan din te menge menunudtulà si Balaam he anak ni Beor he meǥinged diyà te Petor he iyan tanà he mid-enakan kandin, he uvey te wahig he Eufrates. Iyan heini menge lalag ni Balak: “Duen menge etew he ebpuun diyà te Ehipto, utew sikandan mahabet ne kayi zan med-ubpà te uvey zey.

⁶Umbe hendini ka ǥuntaan ne rewaki nu heini he menge etew, su edhuna sikandan he gemhanan kenami. Su kela ke mezaag ku zed sikandan ne egkesegseg ku puun kayi te tanè ku. Su netuenan ku he egketuman is ibpenuvadtuvad nu wey is idrawak nu te minsan hentei.”

⁷Umbe, migenat is menge perezumala ziyà te Moab wey Midian he uwiten dan is ibayad ki Baalam. Midtudtulan dan heini te migkaǥi ni Balak.

⁸Ne migkaǥi si Balaam diyà te kandan te, “Kayi kew zà hizeǥà guntaan he kezukileman, ne egkeǥiyen ku ziyà te keniyu keeselem is egkeǥiyen te Nengazen kayi te kedì.” Umbe ziyà medhizeǥà haazà is menge pengulu te Moab.

⁹Ne mid-insà is Megbevayà diyà te ki Balaam, “Hentei heini is duma nu he menge etew?”

¹⁰Midtavak ni Balaam is Megbevayà te, “Menge menunudtulà sikandan he midsuǥù ni Balak he hadì te Moab, he anak ni Zipor. Iyan heini menge lalag din:

¹¹‘Duen menge etew he ebpuun diyà te Ehipto he utew mezakel. Umbe hendini ka ǥuntaan ne rewaki nu sikandan para kedì. Su kela ke mezaag ku zed sikandan ne egkesegseg ku pehendiyà te meziyù.’ ”

¹²Piru migkeǥiyan te Megbevayà si Balaam te, “Kenè ka zuma kandan. Ne kenè nu rewaki haazà is menge etew he egkeǥiyen dan, su midtuvazan ku sikandan.”

¹³Ked-enew ni Balaam hein meselem, migkeǥiyan din sikan is menge pengulu ni Balak te, “Ulì kew en nasì diyà te nasyun niw su kenà edtuǥut is Nengazen ke eduma a keniyu.”

¹⁴Umbe, midlikù haaza is menge pengulu te Moab diyà te ki Balak he ke sikandan te, “Wazà meduma kenami si Balaam.”

¹⁵Ne mid-uman medsuǥù si Balak te edhuna pa he mahabet he menge pengulu wey edhuna pa he dungganen duen te nehuna he midsuǥù din.

¹⁶Midhendiyè dan te ki Balaam he ke sikandan te, “Iyan heini migkaǥi ni Balak he anak ni Zipor: ‘Kenè nu mehimuwa he zuen ebpekevelavag kenikew te kedhendini.

¹⁷Edsuhulan ku sikew wey ebeelan ku is minsan hengkey he egkeǥiyan nu. Pekelalaglalag ka ne hendini ke en ne rewaki nu heini he menge etew para kediey.’ ”

¹⁸Piru midtavak sikandan ni Balaam te, “Minsan ibeǥey pa kedì ni Balak is turuǥan din he nepenù te pelata wey vulawan, kenà egkehimu ke edrepasen ku is suǥù te Nengazen he Megbevayè ku, dekelà etawa zeisey he vaal.

¹⁹Piru kayi kew zà dèpa hizeǥà guntaan he kezukileman iring te mibeelan te zuma he menge zuma niw, su kela he zuen pa zuma he egkeǥiyen te Nengazen kayi te kedì.”

²⁰Dutun he kezukileman migkaǥi is Megbevayà diyà te ki Balaam te, “Geina te midhengkayi en man heini is menge etew su edumahan ke zan, duma ke en nasì kandan, piru iyan nu zà beeli is egkeǥiyen ku.”

²¹Umbe, hein meselem in-andam ni Balaam is asnu zin ne miduma zuen te menge pengulu te Moab,

²²duma is dezuwa he suluǥuen din. Piru zutun te edhipanew en si Balaam, utew nepauk is Megbevayà, umbe midhitindeg is belinsuǥuen te Nengazen diyà te zalan su ed-alang kandan.

²³Ne hein naahà duen te asnu he midhitindeg is belinsuǥuen te Nengazen diyà te zalan he egkulang te ispada, midsuwey heini zuen te zalan ne ziyà mebayà te vevesukà. Umbe mibpenlagkut heini ni Balaam su wey medlikù duen te zalan.

²⁴Ne midhitindeg sikan is belinsuǥuen te Nengazen diyà te meliǥet he ibayà su nekepetug-elang te zezuwa he verengbeng te pemuleey te paras.

²⁵Hein naahà duen te asnu sikan is belinsuǥuen te Nengazen utew heini mibpekilid duen te verengbeng ne nelipit is paa ni Balaam. Umbe mid-umanan din heini penlegkuta.

²⁶Ne midhipanew ziyà te egkehunaan sikan is belinsuǥuen te Nengazen ne midhitindeg diyà te meliǥet he lugar he wazè en duen egkeeliǥuwan diyà te zapit te kewanan etawa givang.