Numero 21:7-14

⁷Maʌ̃ bẽrã israelerãra Moisemaa wãnaped̶a jarasid̶aa: –Dairãba cadjiruada osid̶aa Ãcõrẽda, bʌ sid̶a biẽ́ jarasid̶a bẽrã. Dai quĩrã djuburia Ãcõrẽa iwid̶idua naʌ̃ damara ãyã wãbicuamãrẽã.– Ara maʌ̃da Moiseba ãdjirã carea Ãcõrẽa bed̶ea djuburiasia.

⁸Maʌ̃ne Ãcõrẽba Moisea jarasia: –Bronceda dama quĩrãca ab̶a oped̶a bacuru erad̶ad̶e ʌ̃tʌ jira b̶ʌdua. Damaba ab̶aʌda casira, maʌ̃ ẽberãba bronce od̶a damada acʌibʌrʌ biaya.–

⁹Ara maʌ̃da Moiseba bronceda dama quĩrãca oped̶a bacuru erad̶ad̶e ʌ̃tʌ jira b̶ʌsia. Damaba ab̶a cabʌrʌd̶e maʌ̃ ẽberãba bronce od̶a damada acʌsira biabadjia.

¹⁰Mamaʌba wãnaped̶a israelerãra Obot abadad̶e duanesid̶aa.

¹¹Mamaʌba wãnaped̶a Ije-Abariʌ̃ne duanesid̶aa. Maʌ̃ra Moab druad̶eba ʌ̃mãdau odjabariare ẽjũã põãsa ewaraga b̶ʌd̶e b̶ʌa.

¹²Mamaʌba wãnaped̶a Zared do jewed̶ad̶e duanesid̶aa.

¹³Mamaʌba wãnaped̶a Arnoʌ̃ do quĩrãrẽ duanesid̶aa ẽjũã põãsa ewaraga b̶ʌd̶e. Maʌ̃ ẽjũãra amorreorã druad̶e b̶ʌa. Arnoʌ̃ dora Moab drua idjab̶a amorreorã drua ẽsi b̶ʌa.

¹⁴Maʌ̃ bẽrã carta Ãcõrẽ Djõna abadad̶e nãwã b̶ʌ́ b̶ʌa: Vaheb puru Supa druad̶e b̶ʌare, Arnoʌ̃ do jʌwateare bid̶a wãyã wãsid̶aa. Do zaque b̶ea caita Ar abadad̶aa wãsid̶aa Moab drua orrocawa.