Numero 18:9-32

⁹Duen niw vahin duen te segradu he menge pemuhat he kenà edtutungen, he ibpemuhat te menge etew kayi te kedì he segradu he menge pemuhat. Ragkes en kayi is menge pemuhat he para gasa, pemuhat he para idlumpiyu, wey pemuhat he vayad te salà. Iyan heini vahin niw te menge anak nu.

¹⁰Keena niw heini ziyà te utew mahal he lugar. Iyan dà is menge maama ebpekekaan kayi ne isipa niw heini he segradu.

¹¹Is duma he pemuhat te menge Israilihanen he ibayew ziyà te pemuhatà, ne para zaan keniyu. Imbeǥey ku heini kenikew wey te menge kevuwazan nu he keniyu he vahin taman te taman. Ebpekekaan kayi is minsan hentei ziyà te pemilya nu he ed-isipen he lumpiyu.

¹²Imbeǥey ku zaan keniyu is meupiya he menge sebpet he idhalad te menge Israilihanen he ebpuun te egkehuna he sebpet dan: lana te ulibu, binu, wey trigu.

¹³Uya, egkehimu he keniyu is langun he menge sebpet dan he idhalad dan kayi te kedì he ebpuun diyà egkehuna he egkeraǥun dan diyà te tanè dan. Ebpekekaan kayi is minsan hentei ziyà te pemilya nu he ed-isipen he lumpiyu.

¹⁴“Is langun he menge vutang te menge Israilihanen he ebpuun te keputian te atey is kebeǥaya zuen kayi te kedì, ne egkehimu he keniyu.

¹⁵Is langun he kinekekayan he anak he maama, etew man etawa uyaǥen, he idhalad kayi te kediey ne keniyu zaan. Piru kinahanglan he ibpelekat niw is menge kinekekayan he menge anak he maama wey is menge kinekekayan he menge uyaǥen he ed-isipen he meremerik.

¹⁶Ipelekat niw heini emun senge vulan en is keǥurang dan, ne kinahanglan he ipelekat niw heini te lelima he vuuk he pelata, he ibpesikad diyà te keveǥat te pelata ziyà te timbangan he egemiten te menge memumuhat.

¹⁷Piru kenè niw mulà ipelekat is kinekekayan he tudu he vaka, kerehidu, etawa kambing su kediey en haazà. Lepaa niw heini ne ipirik niw is lengesa kayi ziyà te pemuhatà ne tutunga niw is menge tavà he pemuhat pinaaǥi te hapuy. Is kehemut kayi he pemuhat te pinaaǥi te hapuy ne ebpekepenunuat kedì.

¹⁸Keniyu is usa kayi, iring te kumeng wey kewanan he vuvun te pemuhat he ibayew he keniyu zaan.

¹⁹Uya, ibeǥey ku keniyu heini is langun he menge segradu he pemuhat he ibayew te menge Israilihanen kayi te kedì. Para heini kenikew wey te menge kevuwazan nu he iyan keniyu he vahin taman te taman. Iyan heini kebpekid-uyun ku kenikew wey te menge kevuwazan nu he kenà egkahalin taman te taman.”

²⁰Migkaǥi pa is Nengazen diyà te ki Aaron te, “Sikiyu is menge memumuhat, wazè niw egkepengevilin he tanà te Israel, su iyan a mismu ebeǥey te menge kinehenglanen niw.

²¹“Ne sikan is menge Levihanen, ebeyazan ku sikandan te kebpenilbi zan diyà te Tulda. Ibeǥey ku kandan is langun he ikepulù he ibeǥey te menge Israilihanen he kandan he egkepengevilin.

²²Puun guntaan wazè en menge Israilihanen he ebpekeuvey zuen te Tulda he Edtelevukaayan gawas te menge memumuhat wey menge Levihanen, su emun ed-uvey sikandan, televaken dan is salè dan ne ebpatey sikandan.

²³Is menge Levihanen, kandan he ketengdanan is menge vuluhaten diyà te Tulda he Edtelevukaayan, ne televaken dan is egkehimu zan he salà kayi te vuluhaten dan. Heini he sulunuzen kinahanglan he tumana niw taman te huziyan he lapis te menge kevuwazan. Is menge Levihanen ne wazà egkepengevilin dan he tanà te Israel.

²⁴Hinuun, ibeǥey ku kandan he kandan he vahin is menge ikepulù he ibeǥey te menge Israilihanen he halad dan kayi te kediey. Umbe migkaǥi a he is menge Levihanen wazà egkepengevilin dan he tanà te Israel.”

²⁵Midsuǥù te Nengazen si Moises

²⁶he keǥiya zin heini ziyà te menge Levihanen: “Emun egkezawat niw puun te menge Israilihanen is ikepulù he ibeǥey ku keniyu he iyan bahin niw, kinahanglan he veǥey kew zaan te ikepulù niw puun dutun te ikepulù, ne ihalad niw haazà kayi te kedì.

²⁷Ne ed-isipen ku heini he halad niw he ebpuun te menge sebpet, he iring te midhalad kew te trigu he ebpuun diyà te ǥunasà etawa vinu he ebpuun diyà te keresà te paras.

²⁸Pinaaǥi kayi ebpekeveǥey kew zaan te halad kayi te kedì puun te langun he ikepulù he egkezawat niw ziyà te menge Israilihanen. Ne is kediey he vahin he iyan is ikepulù te ikepulù he egkezawat niw ne iveǥey niw ziyà te ki Aaron he memumuhat.

²⁹Kinahanglan he iyan niw ivahin kedì is kineupiyahan he vahin he ibeǥey keniyu.

³⁰Emun igkahalad niw en is kineupiyahan he vahin, ed-isipen ku heini he halad niw he ebpuun diyà te ǥunasà etawa keresà te paras.

³¹Egkehimu he egkeenen niw wey te pemilya niw is keniyu he vahin diyà te minsan hendei, su suhul niw heeyan tenged te kebpenilbi niw ziyà te Tulda he Edtelevukaayan.

³²Kenè kew ebpekesalà emun egkeenen niw heini emun ingkahalad niw en is kineupiyahan he vahin kayi ziyà te Nengazen. Umbe siguruwa niw he kenè niw egkependezeisek is segradu he menge halad te menge Israilihanen pinaaǥi te kegkeena niw te vahin niw te wazè niw pa ikeveǥey is kediey he vahin, su wey kew kenà mebpatey.”