Numero 16:16-37

¹⁶Maʌ̃be Moiseba Corea jarasia: –Nu bʌra, bʌare panʌrã sid̶a Ãcõrẽ quĩrãpita wãnadua idji wua demaa. Aaroʌ̃ sid̶a mama b̶aya.

¹⁷Bʌare panʌ 250 ẽberãrãba ãdji quera babada eped̶ecora edad̶aped̶a querara coa nũmʌnadua. Maʌ̃gʌra Ãcõrẽ wua demaa idji quĩrãpita eded̶adua. Bʌa, Aaroʌ̃ bid̶a bãrã quera babada eped̶ecora eded̶adua.–

¹⁸Nurẽma ãdjirãza quera babada eped̶ecoda edad̶aped̶a tʌbʌdauda ed̶a b̶ʌd̶aped̶a querada coa nũmʌsid̶aa. Ãdjirãra, Moisera, Aaroʌ̃ sid̶a Ãcõrẽ wua ded̶e ed̶a wãbada caita duanasid̶aa.

¹⁹Coreba jũma Israel purura Ãcõrẽ wua ded̶e ed̶a wãbadamaa zebisia Moise, Aaroʌ̃ sid̶a ãyã b̶ʌd̶i carea. Cawaẽ́ne Ãcõrẽ quĩrãwãrẽã dorrodorroada ãdjirã quĩrãpita ʌ̃naga dogosia.

²⁰Maʌ̃ne Ãcõrẽba Moisea, Aaroʌ̃a bid̶a jarasia:

²¹–Naʌ̃ ẽberãrã caitabemada ãyã wãnadua. Mʌ̃a ãdjirãra ab̶ed̶a jũma quinibiya.–

²²Baribʌrʌ Moisera Aaroʌ̃ sid̶a chĩrãborod̶e b̶arru copanenaped̶a Ãcõrẽa nãwã bed̶ea djuburiasid̶aa: –Ãcõrẽ, bʌd̶eba ẽberãrãra jũma zocai b̶eaa. ¿Ab̶aʌba cadjirua od̶a carea bʌra jũma naʌ̃ puru ume quĩrũ b̶aica?–

²³Ãcõrẽba Moisea jarasia:

²⁴–Purua jaradua Core wua de caitabemada, Dataʌ̃ wua de caitabemada, idjab̶a Abiraʌ̃ wua de caitabemada ãyã wãnamãrẽã.–

²⁵Ara maʌ̃da Moisera piradrʌped̶a Dataʌ̃ b̶ʌmaa idjab̶a Abiraʌ̃maa bid̶a wãsia. Israelerã bororã sid̶a Moise caid̶u wãsid̶aa.

²⁶Maʌ̃ne Moiseba purua jarasia: –Jãʌ̃ cadjirua obadarã wua de caitabemada ãyã wãnadua. Ãdjia eropanʌnebemada tãrãnadua. Tãnibʌrʌ bãrã sid̶a beud̶ia jũma ãdjia cadjirua oped̶ad̶a carea.–

²⁷Ara maʌ̃da israelerãra Core wua de caitabemada, Dataʌ̃ wua de caitabemada idjab̶a Abiraʌ̃ wua de caitabemada ãyã wãsid̶aa. Maʌ̃ne Dataʌ̃ra, Abiraʌ̃ sid̶a ãdji wua de dajada zed̶aped̶a ãdji ded̶e ed̶a wãbada caita ʌ̃ta nũmeasia. Ãdji ume dji quimada, jũma ãdji warrarã sid̶a nũpanasid̶aa.

²⁸Maʌ̃ne Moiseba jarasia: –Nãwã bãrãba cawad̶ia ara mʌ̃djia quĩrĩã b̶ʌd̶eba bãrã boroda b̶eẽ́ basida, ãtebʌrʌ Ãcõrẽbʌrʌ mʌ̃ra b̶ʌsida:

²⁹naʌ̃ ẽberãrãda dadji beubada quĩrãca beud̶ibʌrʌ, bãrãba cawad̶ia Ãcõrẽba mʌ̃ra b̶ʌẽ́ basida bãrã boro bamãrẽã.

³⁰Baribʌrʌ Ãcõrẽba egoroda cawaẽ́ne yã dogobiped̶a ãdjira, jũma ãdjia eropanʌ sid̶a egoroba mĩbʌrʌ, ãdjirã zocai panʌne beud̶arã jaure panabadamaa wãnibʌrʌ, bãrãba cawad̶ia ãdjiabʌrʌ Ãcõrẽda igarasid̶ada. Mãwã cawad̶ia, ẽberãrã maʌ̃ quĩrãca beubʌdada dadjirãba wad̶ibid̶a ununaca bẽrã.

³¹Moiseba mãwã jarabʌrʌd̶e Dataʌ̃ b̶ʌmaʌba ab̶a Abiraʌ̃ b̶ʌmaa egorora yã dogosia.

³²Maʌ̃ne egoroba ãdjira, ãdji ẽberãrãra, Corera, idji ẽberãrãra, idjab̶a jũma ãdjia eropanana sid̶a mĩsia.

³³Ãdjirã mĩped̶a egorora wayacusa araa catʌ dogosia. Mãwã zocai panʌne maʌ̃ ẽberãrãra jũma ãdjia eropanana sid̶a beud̶arã jaure panabadamaa wãsid̶aa. Israelerã tãẽnabemada nẽbasid̶aa.

³⁴Egoroba mĩbʌrʌd̶e maʌ̃ ẽberãrã b̶iabʌda carea ãdjirã caita duanʌra ãyã pira wãsid̶aa. Maʌ̃ne nãwã b̶iasid̶aa: –¡Egoroba dadjirã sid̶a mĩcuaya!–

³⁵Maʌ̃ awara Ãcõrẽba tʌbʌ uruada idji b̶ʌmaʌba quera bá dia panʌ ẽberãrãmaa eradrʌbisia. Mãwã eradrʌbʌrʌba maʌ̃ 250 ẽberãrãra jũma bá quenasia.

³⁶Maʌ̃be Ãcõrẽba Moisea jarasia:

³⁷–Sacerdote Aaroʌ̃ warra Eleazaa jaradua quera babada eped̶ecora tʌbʌ cowa nũmʌnebemada jʌrʌ pemãrẽã. Tʌbʌdau eped̶ecod̶e wad̶i b̶ʌra ãyã tʌmʌ peabueida b̶ʌa. Maʌ̃ eped̶ecod̶e mʌ̃́a querada bá diasid̶a bẽrã eped̶ecora mʌ̃ itea b̶esia. Jãʌ̃ ẽberãrãba cadjiruada oped̶ad̶a bẽrã beusid̶aa. Maʌ̃ bẽrã ãdji eped̶ecora pewed̶ea berrachid̶aped̶a animarã babue diabadad̶e cara b̶ʌd̶adua israelerãba quĩrãnebad̶amãrẽã baridua ẽberãba querada mʌ̃́a bá diacara b̶ʌda.–