Numero 16:13-28

¹³Kenè pe be ereg is kegkuwaa nu kenami ziyà te Ehipto he meupiya wey uuzaran is tanà duen su wey key kenikew mehimetayi kayi te sibsivayan? Ne ǥuntaan egkesuat ke pa he edhadìhadì kenami.

¹⁴Ne liyu keniyan, wazè key kenikew dumaha ziyà te tanà he meupiya wey selebpeten wey wazè key kenikew veǥayi te menge vevesukà etawa pemuleey te paras he egkaangken dey. Ne ǥuntaan, egkesuat ke pa he edtuntu kenami? Kenè key edhendiyan te kenikew!”

¹⁵Ne utew nepauk si Moises ne ke sikandin diyà te Nengazen te, “Kenè nu zewata is menge pemuhat dan. Wazà a mekesalà diyà te minsan hentei kandan; wazà minsan sevaha he asnu he migkuwa ku ziyà te kandan.”

¹⁶Migkeǥiyan ni Moises si Kora te, “Keeselem, sikew wey is menge sumusunud nu, hendiyè kew te etuvangan te Nengazen diyà te Tulda he Edtelevukaayan, su edhendiyà daan si Aaron.

¹⁷Is kada sevaha zuen te 250 he menge sumusunud nu, ipeuwit nu te teleǥuey te veyewà ne peteǥui nu kandan te veyewà, he para te ibpemuhat diyà te Nengazen. Ne sikiyu ki Aaron, uwit kew zaan te tigselimbaha he teleǥuey te veyewà.”

¹⁸Umbe, migkuwa is kada sevaha kandan te keugelingen din he teleǥuey ne midteǥuan din haazà te veyewà wey vaǥa, ne midhitindeg sikandan duma ki Moises wey ki Aaron diyà te gemawan te Tulda he Edtelevukaayan.

¹⁹Ne hein netiǥum en ni Kora is menge sumusunud kandin diyà te etuvangan ni Moises wey ni Aaron, diyà te ǥemawan te Tulda he Edtelevukaayan, mibpeehè en te langun he etew zutun is mekeǥeǥehem he kebpekiduma te Nengazen kandan.

²⁰Migkeǥiyan te Nengazen si Moises wey si Aaron,

²¹“Pekeziyù kew kayi te menge etew su ebpenhimetayan ku sikandan guntaan.”

²²Piru midluhud si Moises wey si Aaron he ke sikandan te, “He Megbevayà he ebpuunan te untung te langun he menge etew, edelehiǥen nu ve te pauk nu is langun he etew kayi te sevaha zè man is nekesalà?”

²³Migkaǥi is Nengazen diyà te ki Moises te,

²⁴“Keǥiyi nu is menge etew he mebpekeziyù dan diyà te menge tulda keniyan te tetelu he si Kora, si Datan, wey si Abiram.”

²⁵Ne mibeyaan ni Moises si Datan wey si Abiram, ne midtinundug kandin is menge perezumala te Israel.

²⁶Ne migkeǥiyan din is menge etew te, “Pekeziyù kew ziyà te menge tulda keniyan te lalung he menge etew! Kenè kew ǥawed te minsan hengkey he ǥaked dan, su emun ebeelan niw heini ne edèdeetan kew tenged te langun he menge salè dan.”

²⁷Umbe, mibpekeziyù is menge etew puun dutun te menge tulda ni Kora, ni Datan, wey ni Abiram. Ne migawas si Datan wey si Abiram ne midhitindeg dan diyà te ǥemawan te menge tulda zan duma te menge esawa zan wey menge anak dan.

²⁸Migkeǥiyan ni Moises is menge etew te, “Pinaaǥi kayi egketuenan niw he iyan midsuǥù kedì is Nengazen te kebaal kayi he menge vaal, ne kenà kediey zà he suat!