Numero 15:24-36

²⁴Ne emun wazè niw tivevaa is kedrapas niw kayi, su wazè niw metueni he nekerapas kew, sikiyu wey is langun he keet-etawan mebpemuhat kew te sevaha he turiti he vaka he iyan pemuhat he edtutungen hein netuenan niw he nekesalè kew. Pemuhat heini he ebpekepenunuat kedì is kehemut din. Ilapik niw kayi is egkinehenglanen he pemuhat he para gasa wey pemuhat he inumen, wey sevaha he meemahan he kambing he pemuhat he para idlumpiyu.

²⁵Ibpemuhat heini te memumuhat para mevelukasi is langun keniyu tenged te salè dan. Ebpeseyluwen ku sikandan su wazè dan man haazà tivevaa, wey mid-uwit man daan sikandan te pemuhat pinaaǥi te hapuy wey pemuhat he para idlumpiyu.

²⁶Uya, ebpeseyluwen ku is tivuuk he keet-etawan te Israel, ragkes is kenà menge Israilihanen he emurè dan te inged, su neuwit-uwit is langun dutun te salà he wazà tivevaa.

²⁷“Ne emun sevaha zà he etew is nekesalà te wazà tivevaa, ne med-uwit sikandin te sevaha he vehiyan he kambing he senge-tuig is keǥurang din he pemuhat he para idlumpiyu.

²⁸Ibpemuhat heini te memumuhat diyà te etuvangan ku su para mevelukasi haazà he etew tenged te salè din he wazè din tivevaa ne ebpeseyluwen ku sikandin.

²⁹Neked-iring dà is sulunuzen he para zuen te nekesalà he wazè din tivevaa, Israilihanen man etawa kenà Israilihanen he emurè niw te inged.

³⁰“Piru sikan is midtivevà is kebaal zin te salà, Israilihanen man etawa kenà, ne midsumpalit e zin. Ne kinahanglan he kenè en sikandin egkilelaan he zuma niw.

³¹Su inselikwey zin is lalag ku wey midsupak din is suǥù ku. Kenè niw sikandin kilelaa he sakup niw. Ne televaken din is salè din.”

³²Hein diyà te sibsivayan is menge Israilihanen, duen etew he neehè dan he nengayu zutun te Andew te Kedhimeley.

³³Miduma sikandin duen te menge etew he nekaahà kandin diyà te ki Moises wey ki Aaron wey ziyà te kezekelan.

³⁴Ne mibpirisu zan sikandin su wazè dan pa mekesiguru ke hengkey is ereg he ebeelan dan kandin.

³⁵Ne migkaǥi is Nengazen diyà te ki Moises te, “Kinahanglan he edhimetayan haazà he etew, ibpetuleng sikandin te vatu te langun, diyà te ǥawas te kampu.”

³⁶Umbe, mid-uwit sikandin te menge etew pehendiyà te ǥawas te kampu ne mibpenuleng dan te vatu taman te minatey, sumalà te insuǥù te Nengazen ki Moises.