Numero 12:12-15

¹²Maria cacuara idu jũma ãrĩ b̶ebirãdua warra ʌradʌgad̶a quĩrãca.–

¹³Ara maʌ̃da Moiseba Maria carea Ãcõrẽa quĩrã djuburiada nãwã iwid̶isia: –Ãcõrẽ, mʌ̃ quĩrã djuburia mʌ̃ djabawẽrã Mariara biabidua.–

¹⁴Ãcõrẽba panusia: –Idji zezaba cawa obʌrʌd̶e idji quĩrãdarrad̶e id̶od̶abara, ¿siete ewari puru jĩga b̶ʌd̶aẽ́ bacasid̶aca quĩrã peramãrẽã? Ara maʌ̃ quĩrãca bãrãba idjira siete ewari puru jĩga b̶ʌd̶ida panʌa. Mãwãnacarea poya jẽda zeya.

¹⁵Ara maʌ̃da israelerãba Mariara puru jĩga b̶ʌd̶e wãsid̶aa siete ewari mama b̶amãrẽã. Maʌ̃ siete ewarid̶e israelerãra nocod̶aa wãnaẽ́ basía ab̶a Maria jẽda zebʌrʌd̶aa.