Numero 10:3-23

³Emun ibpedredsà te ebpezaǥing haazà is dezuwa he trumpita ne edtiǥum is langun he menge etew ziyà te ǥemawan duen te Tulda he Edtelevukaayan.

⁴Emun sevaha zà is ibpezaǥing, ne iyan dà is menge pengulu te kada tribu is edtiǥum diyà te etuvangan nu.

⁵Emun ibpezaǥing haazà is trumpita te para te kebpaandam te menge etew te kedhipanew, is tribu he ziyà megkampu te zapit te edsilaan duen te Tulda ne iyan medhuna medhipanew.

⁶Ne emun ikezuwa he kebpezeǥinga zuen te trumpita, ne iyan en maan megenat is tribu he egkezivavà duen te Tulda. Is kebpezeǥinga kayi iyan tuus te kebpeǥenata kandan.

⁷Piru selakew is kebpezeǥinga zuen te trumpita emun ibpetiǥum sikandan.

⁸“Iyan dà is menge kevuwazan ni Aaron he menge memumuhat mebpezaǥing duen te menge trumpita. Heini he sulunuzen, kinahanglan he edtumanen niw wey te menge kevuwazan niw taman te taman.

⁹“Emun diyè kew en te tanè niw, ne ebpekidtebek kew te menge kuntada niw he edrasey keniyu, ipezaǥing niw is menge trumpita su para siak is Nengazen he Megbevayè niw, egketenuzan ku sikiyu ne edlibriyen ku sikiyu te kedezaat te menge kuntada niw.

¹⁰Emun timpu te kedlipey niw zutun te kedsilibra niw te menge pista te netendek he timpu te kebeeli zuen, ragkes en is Pista te Kebpuun te Hayag–pezaǥing niw is menge trumpita emun ebpemuhat kew te menge pemuhat he edtutungen wey pemuhat he para te meupiya he kedepità. Heini he menge trumpita ebpetanudtanud kediey te Megbevayè niw te kebpekid-uyun ku keniyu. Iyan a Nengazen he Megbevayè niw.”

¹¹Hein ike-20 he andew te ikezuwa he vulan, te ikezuwa he tuig puun te kegawas te menge Israilihanen diyà te Ehipto, midhendiyà te zivavew sikan is gapun duen te Tulda he Ed-ezapan he zutun itaǥù sikan is Kesuǥuan.

¹²Ne midhipanew is menge Israilihanen puun te sibsivayan he Sinai ne edhalinhalin te menge lugar, taman te mibpundu sikan is gapun diyà te sibsivayan he Paran.

¹³Iyan heini nehuna he timpu te kedhipanew zan, he sumalà te suǥù te Nengazen pinaaǥi ki Moises.

¹⁴Is grupu he midhuna he uwiten dan is bendira zan iyan is grupu he ebpenguluwan te tribu ni Juda. Is pengulu zan iyan si Nashon he anak ni Aminadab.

¹⁵Is tribu ni Isacar mibpenguluwan ni Netanel he anak ni Zuar.

¹⁶Ne is tribu ni Zebulun mibpenguluwan ni Eliab he anak ni Helon.

¹⁷Hein netines en sikan is Tulda he Ed-ezapan, midtival en heini te menge kevuwazan ni Gershon wey menge kevuwazan ni Merari. Ne midtinundug sikandan medhipanew.

¹⁸Ne is midtinundug kandan he ed-uwit te bendira zan iyan is grupu he ebpenguluwan te tribu ni Reuben. Is pengulu zan iyan si Elizur he anak ni Shedeur.

¹⁹Is tribu ni Simeon mibpenguluwan ni Shelumiel he anak ni Zurishadai.

²⁰Ne is tribu ni Gad mibpenguluwan ni Eliasaf he anak ni Deuel.

²¹Ne midtinundug kandan is menge kevuwazan ni Kohat he ed-uwit te segradu he menge gelemiten duen te Tulda he Ed-ezapan. Kinahanglan he igkepelastar en sikan is Tulda te kenè pa sikandan ebpekeuma ziyà te lugar he egkempuwan dan.

²²Ne is midtinundug kandan he ed-uwit te bendira zan iyan is grupu he ebpenguluwan te tribu ni Efraim. Is pengulu zan iyan si Elishama he anak ni Amihud.

²³Is tribu ni Manase mibpenguluwan ni Gamaliel he anak ni Pedazur.