Numero 10:17-26

¹⁷Hein netines en sikan is Tulda he Ed-ezapan, midtival en heini te menge kevuwazan ni Gershon wey menge kevuwazan ni Merari. Ne midtinundug sikandan medhipanew.

¹⁸Ne is midtinundug kandan he ed-uwit te bendira zan iyan is grupu he ebpenguluwan te tribu ni Reuben. Is pengulu zan iyan si Elizur he anak ni Shedeur.

¹⁹Is tribu ni Simeon mibpenguluwan ni Shelumiel he anak ni Zurishadai.

²⁰Ne is tribu ni Gad mibpenguluwan ni Eliasaf he anak ni Deuel.

²¹Ne midtinundug kandan is menge kevuwazan ni Kohat he ed-uwit te segradu he menge gelemiten duen te Tulda he Ed-ezapan. Kinahanglan he igkepelastar en sikan is Tulda te kenè pa sikandan ebpekeuma ziyà te lugar he egkempuwan dan.

²²Ne is midtinundug kandan he ed-uwit te bendira zan iyan is grupu he ebpenguluwan te tribu ni Efraim. Is pengulu zan iyan si Elishama he anak ni Amihud.

²³Is tribu ni Manase mibpenguluwan ni Gamaliel he anak ni Pedazur.

²⁴Ne is tribu ni Benjamin mibpenguluwan ni Abidan he anak ni Gideoni.

²⁵Is kinehuziyanan he midhipanew he ed-uwit te bendira zan iyan is grupu he ebpenguluwan te tribu ni Dan. Iyan sikandan nehimu he vantey ziyà te egkeiniyuǥan he para te langun he grupu. Is pengulu zan iyan si Ahiezer he anak ni Amishadai.

²⁶Is tribu ni Asher mibpenguluwan ni Pagiel he anak ni Ocran.