NUMERA 23:3-17

³Bena Balaam ese Balak e hamaoroa, eto, Emu ḡole-oho boubouna badibadinai ba gini. Lau be bainala, reana Iehova nadekegu ai bainema eiava; bena ede baine hamaorogu toma ma baina hamaoromu. Bena ororo ta ai e dare dae.

⁴Bena Dirava na ia ida e hedavari. Balaam ese e hereva henia, eto, Lau na ihaboulaina patadia hitu vada na abi heḡaeḡae, bona ta ta latadiai boromakau maruanena ta bona mamoe maruanena ta vada na haḡoledia oho.

⁵Bena Iehova ese Balaam baine gwaurai herevadia e henia, eto, A lou lao Balak; dekenai, unu ba hamaoroa toma.

⁶Taunabunai ia na e lou lao ia dekenai; Moab lohiadia iboudiai na unuseni ai gigini, iena ḡole-oho bouboudia badibadidiai.

⁷Bena Balaam na e haroro, eto, Balak ese Aram amo e boirigu, Moab pavapavana ese mairiveina ororodia amo e boirigu; Aoma, eto, Iakob ba uduguiraia, Aoma, Israel ba ihi-ihiraia.

⁸A Dirava ese se uduguiraiamu tauna na Ede baina uduguiraia toma? Iehova ese se ihi-ihiraiamu tauna na Ede baina ihi-ihiraia toma?

⁹Haga amo na itaiamu, Ororo amo na haḡereamu, Ia na noho-edea besena, Bese loḡora ida asie duahia hebou.

¹⁰Iakob ḡahuna daika ese baine hagaua? Israel oreana ta daika ese baine duahidia? Kara maoromaoro tauna ena mase ai baina mase, Egu mauri baine doko iena mauri dokona heḡereḡerena.

¹¹Bena Balak ese Balaam e gwau henia, eto, Ede vada o karagu toma? Inaigu iuduguiraidia totona na boirimu, a oi ese ihanamodia herevadia mo vada o gwaurai.

¹²A Balaam e haere, eto, Iehova ese vada e henigu herevadia na basina gwaurai a?

¹³Bena Balak ma e hamaoroa, eto, Mani a bamogu, gabu ta ma baitala; unu amo ba itadia, a kahikahidia taudia mo ba itadia, iboudiai basio itadia; unuseni ai ba uduguiraidia.

¹⁴Bena ia ese e hakaua lao, Sofimi tanona ai, ela bona Pisga ororona; l dorina; unuseni ai ihaboulaina patadia hitu ma e lareba, bona ta ta latadiai boromakau maruanena ta bona mamoe maruanena ta e haḡoledia oho.

¹⁵Bena Balaam ese Balak e hamaoroa, eto, Emu ḡole-oho boubouna badibadinai ba gini; lau bainala, Iehova ida baia hedavari.

¹⁶Bena Iehova na Balaam dekena ema, baine gwaurai herevadia e henia, eto, A lou lao Balak dekenai, unu ba hamaoroa toma.

¹⁷Taunabunai ia na e lou lao, Balak e davaria, ena ḡole-oho boubouna badibadinai gini, Moab lohiadia ida. Bena Balak ese e nanadaia, eto, Iehova na ede e gwau toma?