15 Vadaeni kerukeru Balaki ese lohia taudia ma haida ia siaia, ia siaia guna taudia be momo lasi bona dagi maragi taudia sibona. To hari ia siaia taudia be momo, bona idia be dagi bada taudia.
16 Idia be Balama dekenai idia lao, idia gwau, “Balaki be inai bamona ia gwau, ‘Mani emu kara, lau dekenai oi mai, oiemu dala ia koua gauna do oi laloa lasi.
17 Badina lau ese davana namo herea oi dekenai do lau henia, bona lau dekenai oi hereva gauna be do lau karaia. Mani oi mai, bona unai bese Israela do oi hadikaia, lauegu noinoi dainai.’ ”
18 To Balama ese Balaki ena hesiai taudia dekenai ia haere, ia gwau, “Bema Balaki ese iena ruma badana mai ena siliva bona golo ibounai lau do ia henia gwauraia, to Lohiabada, lauegu Dirava, ena oda do lau utua diba lasi. Iena oda be lau hamaragia bona habadaia diba lasi danu.
19 To hari hanuaboi mani iniseni do umui mahuta, hesiai taudia gunadia bamona. Unai neganai Lohiabada ena hereva lau dekenai do lau diba.”
20 Unai hanuaboi Dirava be Balama dekenai ia mai, ia gwau, “Inai taudia be oi idia boiria totona idia mai vadaeni. Vadaeni, oi toreisi, idia danu oi lao, to lau ese oi dekenai lau hamaoroa gauna sibona do oi karaia.”
21 Unai dainai Balama be kerukeru dabai ia toreisi, iena doniki ia abia hegaegae, Moaba lohia taudia danu ia lao.
22 To Balama ia lao dainai, Dirava be ia badu, bona Lohiabada ena aneru ta be dala dekenai ia gini, Balama do ia koua totona. Balama be iena doniki dekenai ia guia, bona iena hesiai taudia rua be ia danu idia lao noho.
23 Inai doniki ese Lohiabada ena aneru ia itaia, dala dekenai ia gini, mai ena tuari kaia iena imana dekenai. Vadaeni doniki be dala dekena amo ia raka siri, rei dekenai. To Balama ese doniki ia botaia, dala dekenai ma do ia lao totona.
24 Vadaeni Lohiabada ena aneru be dala ia maragi gabuna dekenai ia gini. Unai dala be vain idia tubu umadia rua edia huanai, bona unai dala kahana kahana dekenai be nadi magudia.
25 Doniki ese Lohiabada ena aneru ma ia itaia, vadaeni ia raka siri, magu badibadinai ia raka. Bona Balama ena aena be magu nadidia dekenai ia botaia, ia bero. Vadaeni Balama ese doniki ia botaia lou.
26 Unai neganai Lohiabada ena aneru ma vaira dekenai ia lao, dala ia maragi herea gabuna dekenai ia gini, idiba bona lauri kahana be raka siri dala lasi.
27 Doniki ese Lohiabada ena aneru ma ia itaia, vadaeni doniki be tano dekenai ia hekure diho, Balama henunai. Balama be ia badu dikadika, bona iena au dekena amo doniki ia dadabaia.
28 Vadaeni Lohiabada ese doniki ena uduna ia kehoa, bona ia ese Balama dekenai ia hereva, ia gwau, “Lau be dahaka lau karaia oi dekenai, to oi ese lau oi botaia nega toi?”
29 Balama ese doniki dekenai ia haere, ia gwau, “Oi ese kavakava tauna bamona lau oi halaoa. Bona bema lauegu imana dekenai tuari kaia ia noho neganai, oi do lau alaia mase.”
30 Doniki ese Balama dekenai ma ia hereva, ia gwau, “Lau be oiemu doniki, ani? Oiemu mauri dinadia ibounai lauegu doruna dekenai oi loaloa vadaeni, ani? Lau be nega ta inai bamona lau karaia, a?” Balama ia gwau, “Lasi.”
31 Unai neganai Lohiabada ese Balama ena matana ia kehoa, vadaeni Balama ese Lohiabada ena aneru ia itaia dala dekenai, iena imana dekenai be tuari kaia ia noho. Vadaeni Balama be ia tui diho, bona iena vairana be tano dekenai ia atoa.
32 Lohiabada ena aneru ese ia nanadaia, ia gwau, “Badina dahaka oiemu doniki nega toi oi botaia? Oi itaia, lau be oi koua totona inai gabu dekenai lau gini, badina be oiemu kara be dika lauegu vairana dekenai.
33 Doniki ese lau ia itaia, bona nega toi lau dekena amo ia raka siri. Bema ia raka siri lasi neganai, lau ese oi do lau alaia mase, to ia do lau hamauria.”
34 Balama ese Lohiabada ena aneru dekenai ia haere, ia gwau, “Lau be lau kerere, badina lau diba lasi oi be dala dekenai oi gini, lauegu dala oi koua. To bema oi laloa inai laolao be dika, lau be do lau giroa lou.”
35 Lohiabada ena aneru ese Balama ia hamaoroa, ia gwau, “Idia danu do oi lao, to lau ese oi dekenai lau hamaoroa hereva sibona do oi gwauraia.” Vadaeni Balama be Balaki ena lohia taudia danu ia lao.
36 Balaki be ia kamonai Balama ia mai noho, vadaeni ia be Moaba ena hanua ta ladana Ara dekenai ia lao, Balama danu ia hedavari totona. Ara be Aranona Sinavai ena badibadinai ia noho, Moaba ena tano hetoa gabuna dekenai.
37 Balaki ese Balama dekenai ia hereva, ia gwau, “Hesiai taudia lau siaia, oi boiria totona, ani? Badina dahaka lau oi kamonai henia lasi? Lau ese oi lau hanamoa diba lasi, a?”
38 Balama ese Balaki dekenai ia haere, ia gwau, “Lau mai vadaeni, ani? To lau be siahu lasi hereva ta do lau gwauraia. Dirava ese lau dekenai ia hamaoroa hereva sibona lau gwauraia diba.”
39 Vadaeni Balama be Balaki danu ia lao, Kiriata Husoto hanua dekenai idia ginidae.
40 Balaki ese boubou gaudia ia alaia, boromakau bona mamoe. Bona edia vamu haida be Balama dekenai, bona ia idia bamoa lohia taudia dekenai ia henidia.
