NUMERA 21:20-33

²⁰Bamoto amo ela bona koura ta Moab kahana ai; ma unu amo ela bona Pisga ororona dorina: unu amo tano ḡaḡaena e roha tari lao.

²¹Israel ese gwaukau taudia e siaidia, Sihon, Amoro pavapavana, dekenai, eto,

²²Mani emu kara emu tano amo baia raka hanai. Basia raka siri, uma ai eiava vine imeana ai basia raka vareai; guri ranudia danu basia inu. Pavapava Dalana amo baia raka, ela bona emu tano amo baia raka lasi.

²³A Sihon ese Israel taudia e gwaudia tao, ena tano amo basie raka hanai eto. Ena orea taudia iboudiai e haboudia, tano ḡaḡaena ela, Israel taudia ilao-henidia totona; bena Iahasa ai e tuari henidia.

²⁴A Israel taudia ese dare amo e alaia mase, ena tano idoinai e abia, Aranon sinavaina amo ela bona Iabok sinavaina ela bona Amono taudia edia tano; a Amono taudia ese edia tano hetoana e ginia ahu auka masemase.

²⁵Bena Israel taudia ese edia hanua iboudiai e abidia; bena Hesebon bona Amoro hanuadia maraḡidia iboudiai e noholaidia.

²⁶Badina be Hesebon na Sihon, Amoro pavapavana, ena hanua; ia ese gunaguna Moab pavapavana gunana e tuari henia, bona ena tano idoinai e abia ela bona Aranon sinavaina.

²⁷Una dainai ane isisibana taudia eto: Aoma Hesebon. Sihon ena hanua baita hadaia, Bona baita ha-aukaia.

²⁸Badina be lahi Hesebon amo e tubu, Lahi hururu-hururuna Sihon ena hanua amo e dae; Ara Moab ai e araia, Aranon ororodia lohiadia e aradia ore.

²⁹Moab e, madi, ihabaimu! Kemoso o toma henia dihomu taumui e, vada o baia! Natuna mamaruanedia vada e luludia oho, Natuna hahinedia vada e abidia mauri, Sihon, Amoro pavapavana, ese.

³⁰Emai diba amo vada a haberodia; Hesebon vada e hebua tari ela bona Dibon, Tano vada a havahua ela bona Nofa, ela bona Medeba.

³¹Unuhetomana Israel na Amoro tanona e noho henia.

³²Bena Mose ese hasinadoa taudia e siaidia, lasere ela; bona lasere hanuadia e abidia, Amoro taudia unuseni ai e nohova na e luludia lasi.

³³Bena idia na e raka Iasi, Basan dalana amo ela. Bena Og, Basan pavapavana, mai ena orea taudia iboudiai ida, e raka Iasi, Edrei ai e tuari henidia.