NUMERA 21:1-24

¹Arada pavapavana, tau Kanaan, diho kahana ai e nohova, vada e kamonai Israel na Atarim dalana amo e maiva, bena ia ese e tuari henidia bona haida e abidia mauri.

²Bena Israel taudia ese Iehova e gwau henia hamata, eto, Ina bese be ai imamai ai ba henimai, bena ai ese edia hanua baia habuadia tari.

³Bena Iehova ese Israel taudia edia noinoi e abia dae, Kanaan taudia na idia imadia ai e henidia; bena idia ese una bese taudia e aladia ore bona edia hanua e habuadia tari. Taunabunai una gabu ladana e hatoa Horoma.

⁴Bena Horo ororona amo ma e laolao, Davara Kakakakana dalana amo e laova, Edom tanona murimurina amo bae raka hanai eto. A dala ai e hesiku,

⁵Iehova bona Mose e maumauraidia, eto, Dahaka dainai Aigupto amo o hakaumai lasi, tano ḡaḡaena ai baia mase helaoreana? Badina be asi amai; ranu danu lasi. A ina aniani ḡauna dikana ianina vada ame hesiku.

⁶Bena Iehova ese hekori gaigaidia e siaidia, idia bogaragidiai; gaigai ese e koridia, bena Israel taudia hutuma e mase.

⁷Bena idia na Mose dekena ela, eto, Ai na vada a kara havara, Iehova vada a maumauraia, oi danu vada a maumauraimu: Iehova ba noia, ia ese ini gaigai na ai emai amo baine abidia oho. Taunabunai Mose na e ḡuriḡuri, taunimanima daidiai.

⁸Bena Iehova ese Mose e hamaoroa, eto, Gaigai laulauna ta ba koroa, au-tubua dorina ai ba kapaia kau; bena gaigai ese bae koridia taudia ese bae raraia tao ai na vada bae mauri.

⁹Taunabunai, Mose ese gaigai laulauna ta, auri labora-labora amo e koroa, bona au-tubua dorina ai e kapaia kau, bena gaigai ese e koridia taudia ese una auri labora-labora gaigaina e raraiatao, bena vada e mauri.

¹⁰Israel taudia ma e laolao, Oboto ai e taruha.

¹¹Oboto ma e toretania, ela, Ie-abarim ai e taruha, tano ḡaḡaena ai. Una tano ḡaḡaenana Moab e hevaira henia, mairiveina kahana ai.

¹²Ma e tore isi, ela, Serede kourana ai e tatuha.

¹³Unu amo ma ela, Aranon sinavaina unukahana ai e taruha; una na tano ḡaḡaena ai, Amoro taudia edia tano isena ai. Hari Aranon sinavaina na Moab bona Amoro taudia edia tano hetoana.

¹⁴Una dainai Iehova ena tuari bukana ai vada e tore, eto, Wahebe Sufa ai, Bona Aranon kouradia ai;

¹⁵Koura ege-egedia Ela bona Ara ena noho gabuna, Bona Moab tanona hetoana.

¹⁶Unu amo ma e laolao ela bona Bere: ranu gurina bunai Iehova ese e gwauraia, Mose na e hamaorolaia, eto, Taunirnanima ba haboudia, lau ese ranu baina henidia.

¹⁷Bena Israel ese ina ane e abia: Ranu e, a lohi lohi dae! Ane avabia!

¹⁸Hanua pavapavadia ese guri e ḡeia, Hanua lohiadia ese e hadobua, Dagi auna amo bona itotohi amo. Una tano ḡaḡaena amo ma e laolao, ela bona gabu ladana Matana;

¹⁹Matana amo ela bona Nahaliele; Nahaliele amo ela bona Bamoto;

²⁰Bamoto amo ela bona koura ta Moab kahana ai; ma unu amo ela bona Pisga ororona dorina: unu amo tano ḡaḡaena e roha tari lao.

²¹Israel ese gwaukau taudia e siaidia, Sihon, Amoro pavapavana, dekenai, eto,

²²Mani emu kara emu tano amo baia raka hanai. Basia raka siri, uma ai eiava vine imeana ai basia raka vareai; guri ranudia danu basia inu. Pavapava Dalana amo baia raka, ela bona emu tano amo baia raka lasi.

²³A Sihon ese Israel taudia e gwaudia tao, ena tano amo basie raka hanai eto. Ena orea taudia iboudiai e haboudia, tano ḡaḡaena ela, Israel taudia ilao-henidia totona; bena Iahasa ai e tuari henidia.

²⁴A Israel taudia ese dare amo e alaia mase, ena tano idoinai e abia, Aranon sinavaina amo ela bona Iabok sinavaina ela bona Amono taudia edia tano; a Amono taudia ese edia tano hetoana e ginia ahu auka masemase.